SKorea President office bulah NKorea drone thlawk lut

South Korea khawpui, Seoul-a presidential office chhehvel km 3.7 bial chhung, no-fly zone huam chhungah thla hmasa khan North Korea drone a thlawk lut.

Military official chuan hemi chungchang hi nimin khan sawichhuakin, NKorea drone hi no-fly zone hmar lam tawpah a thlawk lut a, security facility lam erawh a rawn hnaih lo niin a sawi.

Nikum December 26 khan NKorea drone panga chu ramri paltlangin SKorea airspace-ah an lut a, hei vang hian SKorea sipaite chuan fighter jet-te an tir chhuak nghal a ni. Mahse drone-te hi an kapthla thei lo a, darkar eng emaw zat SKorea ram chinah hian an thlawk hman a ni.

SKorea president Yoon Suk-yeol chuan NKorea lamin an airspace an lut leh a nih chuan, kum 2018-a ram pahnih sipaiten inremna an lo siam tawh chu tihtawpah a vau. Inremna an siamah hian border area-a no-fly zone siam te, Demilitarized Zone (DMZ)-a landmine leh guard post tihchhiatte a tel.