Italy sorkar chuan December 21 aṭangin nakkum January 6 thleng chu ramchhunga inzin pawh a khap dawn tih a tarlang a, hei hi Krismas chawlh chhunga Covid-19 hri leng darh tur venna atana a tih a ni.
Zan lama curfew puan chu hman chhunzawm zel a la ni dawn a, curfew hian zan dar 10 aṭanga zing dar 5 a huam a ni. Restaurant chu zan dar 6 thleng hawn phal a ni a, mahse hmun ṭhenkhatah chuan nakkum January 7 thleng khar tura thupek an ni thung.
Ningani khan Italy-ah hian Covid-19 hri avanga thi hi mi 993 an awm a, hei vang hian sorkar chuan inkaihhruaina a siam belh leh a ni. "Europe miten Krismas leh Kumthar chawlh an lawm dan ṭhin leh, hemi atana an lo inbuatsaihnate hi kan hre reng a ni. Mahse tun ṭumah hri a darh loh nan hian sorkar chuan ruahmanna siamin, he hunpui chhung hian kan invenna chu kan thlahdul thei lo a ni," tiin Italy prime minister Giuseppe Conte chuan a sawi.
Italy-ah hian Covid-19 hri leng thawh hnihna a thleng chho mek a, a thawh thumna hi January-ah a thlen phal hlauhthawnawm a nih vangin PM chuan tun thla (December)-a uluk taka invenna sorkarin a siam phah thu a sawi bawk. Hunpui chhunga ramchhunga inzin pawh khapna hian hnathawktu, damlohna thil, mamawh chakkhai ilo phurtute leh emergency chu a huam lo thung. Heng bakah hian sorkar chuan Christmas Day, Boxing Day and New Year's Day-ahte mipuite chu an chenna in chhuahsan lo turin a hriattir bawk a ni.
Ningania Covid-19 vanga thi hi March 27 hnua Italy-a Covid-19 vanga thi an tam ber ṭum a ni a, March 27 khan Covid-19 vanga thi hi mi 969 an awm. Italy-a Covid-19 vanga thi tawh zawng zawng hi nimin thleng kha chuan mi 58,038 an awm tawh a ni.
