Biden-a'n ni 100 chhung hmaituamna hmang turin ngen

US president atana thlan thar Joe Biden chuan Ningani khan US president office a luah ṭan aṭanga ni 100 chhung chu hmaituamna hmang vek turin US mipuite chu a ngen.

Interview a neihnaah Joe Biden chuan office a luah hunah chuan mipuite chu ni 100 chhung hmaituamna hmang turin ka ngen dawn a ni tiin a sawi a, Ni 100 chhung chauh a ngen tur thu leh chatuana hmang tura a tih dawn loh thu a sawi. 

America hi khawvela Covid-19 kai tamna ber leh he hri thihpui tamna ber ram ni mah se, mi tam tak chuan an zalenna nia sawiin hmaituamna hi a hmang ṭha duh lo hle. An rama hri darhna chhan pakhat pawh mipuiten hmaituamna an ngaih pawimawh loh vang nia sawi a ni fo. 

Biden chuan US-a infectious diseases expert Anthony Fauci chu chief medical adviser-ah ruat a nih dawn thu a sawi a, anni nen hian Covid-19 dotu team-te nen kan thawk ho dawn a ni, tiin  a sawi. 

Johns Hopkins University tarlan dan chuan US-a Covid-19 hri kai tawh hi mi maktaduai 14 an chuang tawh a, he hri avanga thi hi mi nuai 2 an chuang tawh bawk. US-a Covid vanga thi tam ber ṭum chu Nilaini kha a ni a, kha mi ni khan he hri vanga thi hi mi 3,157 an awm.