US President thar atana thlan, Joe Biden chuan hun rei tak a adviser lo ni tawh, Ron Klain chu White House chief of staff atan a ruat tih Nilaini khan a puang.

President-elect Biden hian thlan tlin a nih hnua appointment pawimawh a siam hmasak ber a ni. President inthlan result kimchang hi puan a la ni lo a, President ṭanglai Donald Trump chuan a chak loh tih a pawm thu la puang lo mah se, Biden hian sorkar thar dinna tur atan hma a la chho mek. 

White House chief of staff atana Biden-a'n a ruat, Klain hi kum 59 mi niin, President hlui Barack Obama hnuaia vice president anih lai khan a chief of staff a lo ni tawh a, hei vang hian he dinhmun chelh tur hian Biden hian a ruat ngei pawh mi tam takin an lo ring lawk a ni. 

Klain hian public health crisis hmachhawnna kawngah tawnhriat pawh a lo ṭha tawh a, Obama President hun lai, kum 2014-a Ebola hri a darh ṭum khan sorkar chuan hri dona kawnga  hma la turin 'Ebola Czar' atan a lo ruat tawh a ni.

Biden-a'n thuneihna a chan hunah a hmachhawp hautak tur ber Covid-19 hri dona kawngah Klain hi a chhawr ṭangkai hle rin a ni.

"Klain hi ka tan mi hlu tak a ni a, kum tam tak chhung chu hna kan thawk dun tawh a ni. Mi ril tak a ni a, kawng hrang hrangah experience a lo nei tawh a, hri dona kawngah phei chuan mi ṭangkai ta a ni tih ka hria a ni. Kan ram tan kan thawk dun leh thei dawn hi ka phur tawh tak zet," tiin Biden chuan Klain chu White House chief of staff atana a ruat thar chungchang a sawi.

Kum 77 mi Joe Biden ni nakkum January 20-ah US president 46-na ni tura lakluh a ni ang.