Hong Kong eptu legislator-ten banna thehlut

Hong Kong-a eptu pawl, pro-democracy legislator-te chuan an member pui pali ban an nih avanga lungawi lohna lantirin, nimin khan a rualin banna an thehlut. 

Eptu member 19-te hian Nilaini khan an ban tur thu an lo puang tawh a, nimin khan an banna lehkha hi an thehlut a ni.

Nilaini khan China Parliament chuan Hong Kong sorkar hnena ram himna tiderthawng thei nia ngaih legislator-te ban leh hnawhchhuah phalna tur resolution a pass a ni. Resolution pass a nih hnu lawk hian Hong Kong sorkar chuan assembly-a eptu, pro-democracy member palite chu ban an nih thu a puang nghal. 

Member pali ban takte hi September 6-a legislative inthlan neih turah pawh khan an din khapsak an ni tawh a, mahse inthlan hi hripui leng vangin sawn a ni ta thung a ni. 

China-in Hong Kong tana national security law a siam thar duh lohna lantirin hun rei tak China awpbehna duh lo leh demcoracy thlawp lam chuan nawrh an lo huaihawt tawh a ni. Nawrh hauihawtnaa tel mi 10,000 chuang chu man niin, an zingah hian eptu pawl legislator leh activist eng emaw zat an tel. 

China resolution siam hi khawthlang ram hrang hrangte chuan an sawisel a, US national security adiveser Robert O'Brien chuan Chinese Communist Party (CCP) chuan a thutiamte nasa takin a bawhchhia a ni, a ti. China kuta Hong Kong hlan a niha,  'one country, two systems' kalpui a intiamna chu a lem mai a ni tawh tih sawiin, CCP hian Hong Kong-ah on party dictatorship a kalpui chho zel a ni, a ti. European Union-a president dinhmun chelh mektu, Germany bakah Australia ramte pawhin eptu legislator-te ban an ni chu an dem thu an sawi bawk. Britain foregin minister Dominic Raab chuan eptu member-te hnawhchhuah chu Hong Kong zalenna palzutna a ni, a ti. 

Hetih lai hian China chuan thutlukna an siam chu Hong Kong-a boruak muanawm leh hmasawnna a awmna tur niin a sawi thung a, global financial hub chu ram hmangaihtu dik takten an enkawl a ngai a ni, a ti.