Iran chuan nimin zing khan Iraq-a US sipaite hmun pahnih chu ballistic missile-in a kap.
US sipaite'n airstrike hmanga Iran General Soleimani an thahsak hnuah ram pahnih inkar hi a chhiat belh zel a, an invau tawn nasa hle. Nimin zing khan ballistic missile eng emaw zat hmangin Iran chuan Iraq-a Anbar province-a Ain al-Asad base leh Erbill-a base chu an kap a, report kimchang erawh hriat theih a la ni lo. Iraq-a US sipaite hmun beih a nih hnu lawk hian buaina lian tham zawk a chhuah hlauhthawn avangin oil man pawh a sang nghal a, stock pawh a tlahniam chak nghal hle. Crude oil man chu 2.7% -in a sang nghal a ni. Rangkachak man pawh 1.91% in a sang nghal bawk a ni.
Iraq-a US sipaite awmna hmun beih a nih hnu hian US Federal Aviation Administration chuan US airlines-te chu Iraq, Iran leh Gulf of Oman boruakah an thlawh a khap nghal a, Iran leh Saudi Arabia inkar tuipui chunga thlawh a khap bawk.
FAA chuan airlines-te khapna a siamsakna chhan chu Middle East boruak ṭhat loh vang a ni tih sawiin, an tan a hlauhthawnawm thei dawn niin a sawi. Singapore Airlines Ltd pawhin Iraq-a US base beih a nih hnu hian an thlawhtheihna zawng zawngte chu Iran airspace-a thlawh tir loin kawng dangah an thlawh tir nghal dawn tih a sawi.
Korean Air Lines Co Ltd chuan Middle East boruak ṭha lo chho zel avang hian US sipaite beih an nih hma aṭang hian Iran leh Iraq airspace-ah an thlawhtheihnate an thlawh tir tawh lo tih a sawi bawk. US base beih a nih hnuah Japan chuan Iraq-a an ram palaite chu Japan-a kir tir turin a ti a, ram hrang hrang sorkarte pawh boruak siamṭha tura theihtawp chhuah turin a ngen. Philippines sorkar pawhin Iraq-a an mi leh sa awmte chu hruaichhuak turin thupek a tichhuak nghal bawk.
Iran-in US sipai 80 an thi tih an sawi
Nimin zing inbeihnaah hian thu chiang tak la awm lo mah se Iran chuan US sipai 80 an thi tih leh mi 200 an hliam tih an tarlang thung.
Iran-a Fars News Agency chuan Iranian Revolutionary Guard-ten hemi chungchang hi an sawi tih tarlangin, US base hmun pawimawh 20 vel chu missile 15 hmangin an kap fuh tih an tarlang a ni.
Iran sipaite chuan thuchhuah siam zui nghal bawkin US-in a chhang let a nih chuan na zawka an chhan let ve leh tur thu an tarlang. White House thupuangtu Stephanie Grisham erawh chuan hemi chungchang hi sawi lang loin, thil awmdan chu uluk takin an enfiah mek tih a sawi thung.
