Qasem Soleimani vuinaah mi 56 thi Niminah an vui liam
US-in drone missile hmanga a thah tak Iran general Qasem Soleimani chu ni thum chhung atana sun a nih hnuah, Thawhlehni khan a chenna khua Kerman khuaah vui a ni.
Iran Revolutionary Guards, General Hossein Salami chuan phuba an lak ngei dawn thu a vuina huna kalkawmte hmaah a sawi. Vuina inkhawmah hian mipui tel an tam hle a, mipui innekbuai nasat avang hian mi 56 an thi. Vuina hunah hian mi sang tam tak an pungkhawm a, kalkawm mipuite hian 'America thi rawh se' tih thuziakte an keng a ni. He innek buaina thlengah hian mi 213 an hliam bawk.
Vui hun tikhawtlai, niminah an vui
Mipui innekbuai a nasat avang hian Soleimani vui hun hi tihkhawtlai a ni a, Thawhlehni khan a vuina hun hmang zo loin nimin khan ropui taka vuiliam a ni.
Iran-in missile hmanga US sipai hmun a kah hnu darkar tam pawh a liam hmain Soleimani hi vui a ni a, nimin zing lamah khan vuiliam zui a ni. A kuang bulah mi tam tak an
ṭhingṭhi a, zahna pangpar an hlan bawk. Vuinaa kal zingah hian 'Hnehna chu a hnai' tih thuziak keng hmuh turte pawh a awm a, mi tam tak chuan an ram 'hero' leh 'icon'-ah an ngai.