Ukraine thlawhtheihna chesualah mi 176 an thi

Ukraine thlawh­theihna, Boeing 737-800 chu nimin zing khan a chesual a, thlawhtheihnaa chuang zawng zawng, mi 176-te chu a hmunah hian an thi nghal a ni.

Boeing 727-800-ah hian passenger 167 leh thawktu pakua an chuang a ni. Iran khawpui Tehran-a Imam Khoemeini Inter­national Airport aṭanga thlawk chhuak a ni a, a thlawhchhuah hnu minute 60 velah, Parand leh Shahriar inkarah a chesual zui tih Iran Emergency Medical Service chuan a tarlang.

Ukraine president Volodymyr Zelensky chuan nimin vek khan, Oman pana thlawk chhuak tur thlawhtheihna dang chu thlawh chhuak rih lo turin a hriattir. Thi te leh thi chhungte a tawrhpui tih a sawi nghal bawk.

Thlawhtheihna che­sualah hian Iran mi zirlai an tam ber a, thlasik chawlh hmanga an inlam haw an ni hlawm. Thlawhtheihna chetsual chhan hi hriatchian la ni lo mah se, Iran ISNA news agency chuan thlawhtheihna engine a kan vang niin an tarlang. Iran media-te chuan mi 180 an chuang thu an tarlang ve thung.

Iran mi thi zat hi 82 lai an nih thu tarlan a ni a, Canada mi 63 leh Ukraine mi 11 an thi tih Ukraine foreign minister Vadym Prystaiko chuan a sawi. Thi zingah hian Sweden mi 10, Afghanistan mi pali, German pathum leh British pathum an tel bawk. Tehran-a Ukraine Emba­ssy chuan thuchhuah siamin firfiaka chetna vang emaw rocket hmanga kah thlak a ni tih a puan zet hnuah a thu a sut leh a, thlawhtheihna chetsual chhan chu puan chian leh a ni dawn tih a sawi a ni.