US President Donald Trump chuan dan loa an rama pemlut ṭhinte venna tura dan siamṭha tura Congress nena inremna an siam theih loh chuan, an ram chhimlama Mexico ramri khar tur chuan '100 percent' in a inpeih tawh tih a sawi.
"Congress nen inremna kan siam thei lo a nih chuan ramri hi khar a ni ngei dawn a ni" tiin White House-a amah kawmtu reporter-te hnenah a sawi.
US president chuan central Amreica ram - Honduras, Guatemala leh El Salvador-te chu US-a pemluh tuma a ruala mi tam takin an ram an chhuahsan ṭhinte dang thei loah a puh a, heng ram hnena chhawmdawlna an pek ṭhin pawh tihtawpah a vau a ni.
"Kan tan engmah min tihsak duh lo a, hetihlai hian heng ramte ṭanpuina tur hian dollar maktaduai tel kan pe thung a ni" tiin Trump chuan a sawi. A ruala US an panna turte hi an ruahman sak a, an ram mi leh sa ṭha tak takte an teltir duh silo niin a sawi a, heng mite hi US chuan a lo pawm zel tawh dawn lo bawk tih a sawi.
White House Press Secretary Sarah Sanders pawhin chhim lam ramri khar chu thil ṭha ber a ni thei tih a sawi a, Democrats-te chuan thutlukna dang siam thei lo turin an dah niin a sawi. Mahse Trump leh Sanders-te hian ramri khar tur chungchang hi sawi lang mah se, a hun tur erawh an sawi lang lo.
Trump hian kum 2016 US president thlan dawna a campaign aṭang khan ramdang mi, dan loa US-a pem lutte venna leh khuahkhirhna kalpui a tum thu hi a aupui tawh a ni. Mahse hemi atana a hmalakna kawng khat, Mexico ramri hungna bang siam a tum leh immigration policy siamṭhat chungchangah Democrats lam nen an inrem thei lo a ni.
