May-in eptu hruaitu Bexit deal sawipui dawn

Britain Prime Minister Theresa May-i chuan European Union aṭanga Britain inlakchhuahna tur atana inremna an siamte hnawl a nih zel avanga harsatna an tawk mek sutkian dan ngaihtuah turin eptu party, Labour Party hruaitu Jeremy Corbyn a hmu dawn.

PM chuan Jeremy Corbyn nen hian MP-ten an pawmpui theih ngei turin inremna a lo siam tawh, Withdrawal agreement chu an siamṭhat theih a beisei a ni.

Corbyn chuan inremna siamah hian customs union leh workers' rights-te chu dah pawimawh tura a duh thu a lo sawi tawh a ni.

May-i hian EU hruaitute nena withdrawal agreement an lo siam tawh chu Britain Parliament-ah MP-ten an pawm theih loh vangin March 29-a EU aṭanga an inlakchhuah hun tur chu pawtsei turin a lo ngen tawh a, April 12 thleng pawhsei sak an ni. Hei pawh hi pawtsei leh turin ngen leh a tum a ni.

Britain hian European Parliament inthlanah tel ve tawh loh a tum a nih chuan inremna siam lo mah se May 22 hian a chhuahsan ngei a ngai tawh dawn a ni.

PM May-i inremna siam hi kar kalta Zirtawpni khan Parliament-ah MP te chuan a ṭum thumna atan an hnawlsak leh a ni. Hei vang hian European Commission Donald Tusk chuan April 10 hian Brussels-ah emergency summit a ko a, he hunah hian EU hruaitute chuan UK hi hun pekbelh zel tura ngenin, inremna siam loa EU aṭanga chhuahtir mai tur tih chungchang an ngaihtuah ang.