Canada PM-in an party aṭangin minister hlui pahnih hnawtchhuak

Canada Prime Minister Justin Trudeau chuan cabinet minister hlui pahnihte chu rorellai Liberal Party duhdan kalha thiltiah puhin a hnawtchhuak.

Justice minister hlui Jody Wilson-Raybound leh Treasury Board minister hlui Jane Philpott te chu Liberal legislator zingah an ṭhut an remti tawh dawn lo tih PM chuan a sawi a ni.

February thla khan Wilson-Raybound-i hian justice minister a nih laiin eiruk thubuaiah construction company SNC Lavalin Group Inc. a him theihna atan party official lamin amah chu an nawr nasa hle tih a sawi a, minister a nihna aṭangin a bang zui bawk. He thil hian party chhungah buaina a chawh chhuah phah a ni. Philpott pawh hian a hnu lawkah PM Trudeau-an an party buaina chinfel a tum danah a ring zo tawh lo tih sawiin a bang zui ve leh a ni. Party member dangte chuan party inpumkhatna tichhiaah puhin hnawtchhuak turin an lo nawr fo tawh a ni.

Trudeau chuan minister hlui pahnih leh party hruaitu dangte inkarah inrintawkna a awm tawh lo tih sawiin, party inpumkhatna a chhiat chuan an khingpuiten an hlawkpui zawk dawn a ni tiin hetiang hi a thlen an remti lo tih a sawi. Canada mipuite chu an party chungah an innghat lian hle tih a sawi.