Iran-ah khaw 70-a chengte sawnchhuak turin ti

Iran sorkar chuan ruahsur nasa avanga tuilian tuar thei mai dinhmuna ding, Khuzestan province-a thingtlang khaw 70-a chengte chu hmun him lama sawnchhuak turin thupek a tichhuak.

Kar hnih kalta chhung khan Iran ramah hian ruah a sur nasa hle a, ruahsurin chhiatna a thlenah mi 45 an thi tawh a ni. Hei bakah hian province 31 zinga 23-te chuan tuilian vangin harsatna an tawk mek bawk.

Nimin khan Foreign Minister Javad Zarif chuan thupek hi tichhuakin, US-in chhawmdawlna a pek ṭhin a hrek avangin tuilian tuarte ṭanpuina kawngah harsatna an tawh phah niin a sawi bawk. US hrekna avang hian chhanchhuah hna thawhna tur helicopter hman tur pawh an indaih loh niin a sawi.

Tuilian vang hian mi tam tak chu chenna nei loin an awm a, sorkar in an awm lailawkna tura a siamah an khawsa mek a ni.

Iran hian kum eng emaw zat khawkheng an tawrh hnuah, kar hnih liamta aṭang khan ruah nasa takin a sur a, hei hian chhiatna nasa tak a thlen zui a ni. Red Crescent huan Golestan province-ah phei chuan kum danga kumtluana ruahtui an dawn ṭhin aṭanga 70% vel zet chu ni khat chhungin a sur hman niin an sawi. Lui tam tak a lian a, in eng emaw zat a chhe bawk.