US President Donald Trump chuan Syria-a US sipai 2,000 awmte chu lakchhuahna tur thupek a tichhuak.
President Trump chuan Nilaini khan thupek hi tichhuakin, Syria-ah chuan Islamic State (IS) firfiakte lakah hnehna an chang ta niin a sawi. Syria ram zau tak thunun tawhtu, IS firfiakte chu ram zimteah chauh hualbeh an ni tawh tih a sawi a ni.
US sipaite chuan sipaite lakchhuah an nih dan tur kimchang hi la tihfel ni lo mah se, nakkum January thla laihawlah chuan lakchhuah hman beisei a nih thu an sawi.
Kum 2014 aṭang khan US hian Syria-ah IS firfiakte beiin beihpui a thlak ṭan a, Syria rama hel ṭhenkhatte pawh IS beihletna tur hian training pawh an pe bawk.
Nilaini khan Trump chuan Syria rama an mission chu zawh a ni ta tih a sawi a, an sipaite pawh an haw a hun ta tih a sawi. Trump hian a hma pawhin Syria rama America sipai awmte chu US-a koh haw a duh thu a lo sawi fo tawh a ni.
President Trump-an sipaite lakchhuahna tur thupek a tihchhuah hi Congress lam chuan an sawi zui nghal a, Repubican member ngeite pawhin President chu a thupek siam chungchangah chanchin chiang zawka sawi turin an phut. Official ṭhenkhat chuan President Trump hian US sipaite hian Syria-ah IS firfiakte beih loh chu tihtur dang an nei lo ni anga a ngaih avangin he thupek hi a siam ta mai nia a lan thu an sawi.
US sipaite lakchhuah tum chungchang hi Trump chuan NATO hnuaia a thawhpui, Turkey President Recep Tayyip Erdogan pawh telephone-in a hrilh nghal bawk. Official chuan Trump hian thutlukna hi ama duhthu anga a siam niin, Turkey hruaitu pawh hi a hmain a sawipui lo tih a sawi bawk.
Turkey hian an ram chhim lam ramri bul, Syria hmarchhak lama Kurdish leh Arab group ṭangrual Syrian Democratic Forces (SDF)-te laka beihpui thlakah a lo vau tawh a ni. SDF hian IS firfiakte beihnaah US an thawhpui a ni.
Britain chuan US President-in Syria-ah IS te hnehin an awm ta nia a sawi chu a pawmpui lo tih a sawi. Israel Prime Minister Benjamin Netanyahu chuan Trump-a thutlukna hi an zirchiang dawn tih sawiin, an ram himna turin hma an la dawn tih a sawi bawk.
