Isael-in West Bank aṭanga thlai leh thei lakluh titawp

Israel chuan West Bank aṭanga Palestinian-te tharchhuah thlai leh thei a lakluh ṭhin chu a titawp niin Palestinian official-te chuan an sawi.

Isarel hian ni hnih chhung chu West Bank aṭanga thlai leh thei lakluh a titawp tawh niin Palestinian Ministry of Agriculture director general Abdulla Lahlouh chuan Nilaini khan a sawi. Hemi chungchang hi Israel hian Palestinian Authority pawh a hrilh lawk lo niin a sawi bawk.

Kum 2017 chhung khan West Bank aṭang hian Israel-ah thlai US dollar maktaduai 56 leh thei dollar maktaduai 5 man thawnluh a ni.

Lahlouh chuan Israel hian thei leh thlai lakluh a tihtawp chhan hi a sawifiah lo a nih chuan, Palestinian sorkar chuan an tih ang chiahin a chhang let ve dawn a ni, a ti.

Nilaini zing khan Israel radio chuan Israel Minister of Agriculture Uri Ariel chuan Palestinian-ten Israel ram aṭanga beram lakluh an tihtawp chhan letna atan West Bank aṭanga thei leh thlai lakluh hi titawp ve turin a hriattir niin a sawi a ni. Lahlouh chuan Israel leh an ram ṭhenawm dang aṭanga beram an lakluh ṭhin tihtawp chu Palestinian rama sa man tlakhniam vang leh, Palestinian mi ranvulhtute humhalh an tumna pakhat a ni tih a sawi.