FB-in Myanmar sipai nena inzawm-na nei page leh account titawp

Facebook chuan Myanmar sipai nena a ruka inzawmna nei page leh account eng emaw zat tihtawp a nih thu a sawi.

Myanmar ramah hian Facebook hi social media hman lar ber leh nghawng nei lian ber a ni a, mahse hun eng emaw chen chu Rohingya Muslim te chungchang huatna leh sawisel hlawh tak tak post awm ṭhin chungchangah Facebook hian hma a lak loh avangin sawisel a tawk fo a ni.

Nikum-a Myanmar sipaiten Rohingya-te chenna, Rakhine state-a beihpui an thlak avanga Rohingya mi nuai sarih chuang zet Bangladesh ramah an tlanchhiat vang leh, an in leh lo tam tak tihchhiat sak an nih hnu khan sawiselna a nasa zual a ni.

Facebook chuan Nilaini khan Myanmar sipaite nena an ruka inzawmna neia puh page 425, group 17, account 135 bakah Instagram account 15 tihtawp a nih thu a sawi. Hengte hi independent news, entertainment, beauty leh lifestyle page anga insawi an ni a, mahse a takah chuan sipaite nen a ruka inzawmna nei vek nia sawi an ni. Hei hi Facebook in Myanmar rama page leh account a tihtawp sak ṭum thumna a ni a, August leh October thla khan eng emaw zat a lo titawp tawh bawk.

Myanmar ram mipui tam zawk hi sipai sorkar a tawp hnuah an online ve thei chauh a, civil sorkar a din hnuah smartphone hmang pawh nasa takin an pung chho a ni. Hetihlai hian sorkar chu Rohingya mite beih an nih chungchangah an thlavang hauh lo leh, sipaite dang tura hma lak tawk loa puhin sawiselna a nasa hle