Paris St-Germain chuan Atalanta 2-1 a hnehin Champions League semifinal an lut. Paris club hian goal an phurh hmasak reng hnuin hun tawp dawnah Marquinhos leh Eric Maxim Choupo-Moting te hmanga goal khungin an lehthal.

Khelmual chhunga hmuhnawm leh mit la ber chu Neymar niin, dinhmun khirhkhan taka awm PSG tana danglamna siamtu chu substitute Kylian Mbappe a ni. 1995 hnua a vawi khat nan quarterfinal an paltlang - RB Leipzig leh Atletico Madrid inkhela chak zawk an hmachhawn leh ang.

Nilaini zan Estadio da Luz-a inkhelah Neymar a langsar hmasa ber, Barcelona forward hlui hian box chhung thlenga ball a tlanpui hnuah keeper Marco Sportiello chauh hmachawn tawh mah se goal zawnah a pet lo.

Atalanta lamin rang takin an vaw let nghal, defender Hans Hateboer ball tauh luh a goal dawnin lang mah se keeper Keylor Navas-a'n a lo dang hram. Italian club an tlangnel zel a, striker Duvan Zapata ball tih per changtu Mario Pasalic-a'n minute 26-naah kum mawi takin goal hmahruai a khung.

Inkhel thununtu PSG lamin goal an nei ve thei mai lo, Brazilian forward Neymar-a'n hun ṭha insiam ṭhin mah se goal zawnah a pet thei lo, box sir vei lama a ball lakluh chu hlauhawm viau mah se keeper Sportiello tan hna hautak a siamsak hleithei lo, a teuh thlawn zel.

Minute 60-na a ni a, midfielder Pablo Sarabia la chhuakin Mbappe dah luh a ni. A hnuah Choupo-Moting, Leandro Paredes leh Julian Draxler te dah luh niin ball an chang tam zual, tlarhnung laiah Atalana an din khawng avangin a sir lam aṭangin thapui an thawh.

Hliam damhlim Mbappe-a'n chak tak takin ball a tlanpui a, keeper Sportiello tan hna thawh tur a tam ṭan hle a, a chesual duh lo thung - France international goal shot ṭha zet chu tawih tak maiin a lo dansak. PSG hian goal erawh an nei thei lo, season dang ang bawkin an tla leh dawn niin a lang hman.

Minute 89 thlengin Atalanta 1-0 in an chungnung, mahse inkhel a la tawp lo. Neymar-a'n chep tak karah Marquinhos tan a siamsak a, minute 93-naah Mbappe-a cross chu Choupo-Moting-a'n chakna goal-a tan a khung, forward Mbappe tana through ball petu chu Neymar bawk a ni.

Arab sum hmanga siam len PSG-in Champions League nomawi an duh a, chumi tihlawhtling thei tura an ngaih coach leh player an lei khawm. Pound maktaduai 200 zet sengin Neymar an lei a, a chhanna an hmu chho mek.

Kum 28 mi Neymar-a'n Atalanta lakah player ṭha bik a nihna a lantir, ball a chang hnemin a thawhhlawk hle. Goal khung lo mah se inkhel cheimawitu a ni a, hun tawp dawna an goal khung pahnih chu a thawhrah a ni bawk - Lionel Messi nih rualin 2008 hnuah UCL match khata dribbles (16) nei hnem ber a ni hial.

Brazil international hian PSG-ah hian kar khatah £600,000 (Rs nuai 587) a hlawh mek a, an hneh tak Atalanta player zawng zawng hlawh belhkhawm nen a intluk vela chhut a ni; ani bakah hian kar khata Rs nuai 367 hlawh Mbappe neitu PSG zawk an tlang hi a mak lo.