Mikel-a'n England-a kir a hreh lo

Chelsea midfielder hlui John Mikel Obi chuan England-a kir a hreh loh thu a sawi a, kum 33 mi hi March khan Turkish club Trabzonspor nen inhriatthiam tawnnain an inṭhen a, club dang a la zawm leh rih lo. 

Mikel chuan, "Min duhtu an awm a, England-ah ka kir mai thei. Club ṭhenkhat nen indawrna kalpui mek a ni a, mahse ka hmanhmawh lo," tiin hmanhmawh taka thutlukna siam a tum loh thu a sawi. 

Nigeria captain hlui hi Premier League kai thar West Brom leh Championship club Stoke City nen sawizawm a ni a, a career-ah Norwegian club Lyn, Chelsea, Chinese Super League club Tianjin Teda, Middlesbrough leh Trabzonspor tan a lo khel tawh. 

Mikel-a'n hlawhtlinna tak tak a channa hmun erawh kum 11-a khelhna Chelsea a ni a, Blues tan hian match 372 khelhsak hmanin goal ruk a khung. Premier League (2), FA Cup (3), League Cup (1), FA Community Shield (1), Champions League leh Europa League (1)-ah nomawi a chawi bawk. Nigeria tan vawi 96 inlanin goal ruk a khungsak a, kum 2013-ah Africa Cup of Nations-ah nomawi chawiin a captain-na hnuaiah Africa Cup of Nations, 2019-ah pathumna dinhmun an luah.