Borussia Dortmund-ah Sancho a cham dawn - Zorc

Borussia Dortmund sporting director Michael Zorc chuan season tharah Jadon Sancho-a'n an club tana a khelh tur thu a sawi a, an hun tiam chhunga Manchester United-in an phalna zata an ngam loh avangin thu tawp a nih thu a sawi tel bawk.

Nipui transfer-a Man United lak tum ber chu Jadon Sancho a ni a, Ole Gunnar Solskjaer hoten English winger hi an beisei chhunzawm thei a, player man tlawm zawk an zawng thei bawk ang.

Borussia Dortmund-in Jadon Sancho lak hun atan hun tiam an siam a, August 10 kha an hun tiam tawp hun chu a ni. German club hian English winger man atan hian pound maktaduai 100  bawr vel an chhiar.

Sancho nena sawi zawm Manchester United-in Dortmund chhiarna zat hi Covid-19 vanga an sum lakluh a tlakhniam avangin an ngam lo a, hun tiam chhungin Dortmund nen inremna an nei thei ta lo. 

Kum 20 mi  Sancho hian Manchester City aṭangin kum 2017 khan pound maktaduai 10-in Borussia Dortmund hi a zawm a, German hian man man zawka hralh an tum.

Kumin nipui transfer tawp hun hi October 5 a ni daih nachungin Borussia Dortmund hian season thar atana an inpuahchah duh avangin hun tiam an siam a, an chhiarna zat ngam an awm tak lohah chuan Sancho chhuahtir an tum lo.

Dortmund sporting club director Michael Zorc chuan, "Jadon Sancho hi tun season-a kan bula awm turin ruahmanna kan siam. Chu chu thutlukna tawp a ni a, in zawhna zawng zawng a chhang felin ka hria," tiin Sancho hralh an tum loh thu a sawi.

Zorc chuan sawi chhunzawmin, "Nikum khan Jadon-a hlawh hi a chet ṭhat dan milin kan sansak a, hemi a nih avang hian a contract neih lai chu kum 2023 thleng kan pawtsei tawh bawk," tiin Sancho chu Dortmund-ah an char ngheh thu a sawi.

Borussia Dortmund hian twitter lamah Manchester United ṭantute an kap zui a, 'Hmuh in châk hlawm bawk a' tih thupui hnuaiah Borussia Dortmund kawr nena Jadon Sancho nui lai an dah.

Borussia Dortmund-in Jadon Sancho chelh an tum tak tak em tih a chiang lo a, an chhiarna man zata ngamtu an awm chuan hralh an phal a la rinawm reng. United-in German club hi dawn hniam an tum avangin Dortmund hi an intlawh khalh lawkah a ngaih theih a, hemi a nih avang hian kum 2023 thleng a contract an pawhseisak thu pawh an sawi lang niin a lang.

Tun hnai kum nga chhung vel ringawt pawhin Dortmund hian player hralhna aṭangin sum an hui lut hnem hle. Kum 2016 khan United-in Henrikh Mkhitaryan chu pound maktaduai 30 velin Dortmund aṭangin an lalut, kum 2017-ah Barcelona-in pound maktaduai 135.5-in Ousmane Dembele an leisak a, kum 2018-ah Arsenal-in pound maktuduai 56-in Pierre-Emerick Aubameyang an laksak bawk.

German club sporting director Michael Zorc chuan, "Dembele hian hun rei tak cham turin contract a nei a, season tharah kan bulah a cham dawn chiang," tiin a sawi a, amaherawhchu sum ṭhahnem taka dawrtu an hmuh meuh chuan an chhuahtir.

Chutiang bawkin Zorc hian, "Aubameyang hi nipui thleng kan bulah a cham dawn a, a thurualpuite pawhin hei hi an hria," tiin a sawi a, January thlaah Arsenal-in Gabon striker hi an lalut. Tun ṭumah Zorc hian Sancho cham tur thu a sawi leh a, sum a awm phawt chuan thutlukna a thlak thei ang.

Manchester United-in nipui transfer-ah Bruno Fernandes an lalut thei a, sum sen tam an hlauh avangin an lalut lo. January thlaah United-in Fernandes an lalut chauh a, an ṭhatpui hle. Ole Gunnar Solskjaer hote hian sum ren vangin an duh ber ni lo player dang an lalut thei a, amaherawhchu an ngaihtuah ṭhat a ngai. Man tlawm zawka lakluh Daniel James-a'n khelmual chhungah danglamna a thlen meuh lo a, United hi sum lamah hlawk mah se result lamah nghawng a nei thung.

United midfielder hlui Owen Hergreaves chuan, "Michael Zorc hian thu a thup a ni. Sancho hi United player a nih ngei ka ring," tiin a sawi a. Rio Ferdinand pawhin, "Kum 10 chhung khawvela player ṭha ber ni thei tur lei theihna hun ṭha a awm a, lak mai  a ṭha," tiin a club hlui a nawr.

Paul Scholes chuan, "Manchester United-in Haaland an mamawh ngawih ngawih a, mah se sum an theh chhuak phal lo. Sancho lakah erawh a danglam tawh ka ring. Ole hian a duh tak tak a nih chuan an la ngei ang," tiin United manager Solskjaer ngaihdan a pawimawh thu a sawi.

Borussia Dortmund lamin Jadon Sancho lak theih a nih tawh loh thu an sawi a, amaherawhchu sum a awm chuan a theih niin a lang. Manchester United-in Sancho hi lak an tum a nih chuan sum an thehchhuah tam a ṭul dawn a, mamawhtu zawk tan insen a ṭul ṭhin reng a ni.

Manchester United hian tun hmain an duh ber an chang ṭhin, sum tawktarh vak loh pawhin player zawkin khelh an châk ṭhin. Sir Alex Ferguson-a awm loh hnuah Old Trafford aia player dang hiptu club an tam a, United pawhin an duh ber an la thei lo a nih chuan player dang a melh a ṭul dawn.

United hian Sancho aiah Borussia Dortmund player hlui Ousmane Dembele an melh tia sawi a awm, French forward kum 23 mi hi inhliam vangin Barcelona-ah a khel tam tawk lo. Chutihrualin Catalan club-in Dembele lakluh nan hian pound maktaduai 135.5 an seng ngam a, Neymar thlakna tura an tih ve ngat kha a nih avangin theihna sang tak a nei tih erawh a chiang.

2016/17 pre-season-ah pawh Dembele hian Dortmund kawr hain Jose Mourinho kaihhruai Manchester United player-te chu a bum nual a, German club hian 4-1 in hnehna an chan bakah French forward hian goal a khung. Amaherawhchu tun season La Lgia-ah Dembele hi vawi nga chauh a inlan a, a ṭha zawka thlir chuan goal khat a khung hman hram.

United hi Juventus winger Douglas Costa nen sawi zawm a ni bawk a, chutihrualin Brazilian winger hi Italian club-ah rinrawl a ni pha lo. Kum 29 mi Costa hian season hman zawh tak Serie A-ah khan match 23 inlanin goal khat chiah a khung. Chumai a ni lo, Brazilian club Grêmio, Ukrainian club Shakhtar Donetsk, German club Bayern Munich leh Italian club Juve tan season khata goal 10 khung tling a la nei lo a, Bundesliga-a goal 17 khung baka assist vawi 16 nei Sancho neia khaikhin a ralah chuan a tenau deuh.

Ole Gunnar Solskjaer hote hi Bayern Munich winger Kingsley Coman nen an sawi zawm a, Bavarians-in Leroy Sane an lakluh avangin French winger leh United an sawi zawm hi thilmak a ni lo. Coman hian season liam ta khan Bundesliga-ah match 24-a inlan a, heng zinga 17-ah inkhel bul ṭanin goal li a khung a, vawi thum assist a nei bawk.

Statistic thlir chuan Coman hian Sancho a tluk lo a, nomawi ang zawnga teh erawh chuan French winger hian cho loh a nei lo ang. Kingsley Coman hian 2012-13 season aṭang khan league nomawi a la chawi char char a, Ligue 1-ah PSG leh Serie A-ah Juventus vawi hnih ve ve a champion pui hnuin Bayern Munich-ah kalin Bundesliga nomawi vawi nga a chawi leh tawh a ni.