Zanin dar 12:30-ah UCL inkhel en châkawm Barcelona vs Bayern Munich
Estádio da Luz, Lisbon-ah inkhel hmuhnawm bik khelh a ni dawn a, naktuk Inrinni a ni bawk nen zanin hi football tuimite tan chuan men rei zan a ni leh ta.
Champions League quarterfinal-ah Lionel Messi telna Barcelona leh German champion Bayern Munich te an inhmachhawn dawn a, sawi hnawn theih dan awmchhun chu 'an intum hma mah mah' tih zawng a ni.
Setien Vs Flick
Barcelona-in an manager Quique Setien lakah lungawina an hmu lo a, a thlakna tur an zawng. Setien-a ho hian La Liga-ah champion thei lo mah se Champions League-a Napoli an hneh dan thlir erawh chuan tum châkawm an ni lo.
Setien hian La Liga season tawp lama Antoine Griezmann bench-a a dah ṭumin Sevilla, Celta Vigo leh Atletico Madrid an inhnehtawkpui a, Osasuna lakah an tlawm bawk. Napoli nen erawh Griezmann hi Messi leh Luis Suarez te nen tlarhmaah an awm leh tawh a, an che ṭha.
Coach Setien-a tawnhriat tlem vangin La Liga nomawi an chan tawh a, Champions League quarterfinal-ah pressure a san dawn avangin a talbuai leh thei tlat. Chutihrualin Griezmann erawh 'mini tournament' khelhna Portugal-ah cham rei a tum - hun awl hnawh khah nan Play Station a keng.
Hansi Flick erawh Niko Kovac a thlak aṭangin Bayern Munich an kang zawt zawt a tih theih a, German player-te chungah rinna nghat chhoin Bundesliga chawi lo theia ding hman Bavarians chu treble champion thei dinhmunah a dah.
Bayern-in Barcelona an hneh loh hnuhnun ber khan manager Pep Guardiola chuan, "Tun dinhmunah chuan Messi hi dan theih a ni lo," tiin a khingpui player a fak chiam a, Argentine forward hian first leg-ah goal hnih a khung a, aggregate-ah 5-3 in an chak.
Tun ṭumah erawh Flick-a'n, "Messi chauh kan ngaihtuah dawn lo, player zawng zawng kan thlir dawn," tiin a sawi a, Bayern tlarhnungin pressure an nei tlem sawt ang.
Neuer vs Ter Stegen
Bayern Munich-in Germany no. 1 keeper Manuel Neuer an kawl a, Barcelona-in Germany no. 2 Andre ter Stegen an kawl thung. Ram tana no. 1 nih duh vangin Neuer leh Ter Stegen te hi nikum kum tawp lam khan an inchhang lawk a, boruak a sang hle.
Neuer hi kum 34 mi a ni tawh a, nakkuma Euro C'ship khelh hunah chuan kum 35 a ni tawh dawn. Ter Stegen hi kum 28 mi a ni a, a vanglai a hmang chho mek. Keeper pahnih tan zanin hi a pawimawh lehzual a, Germany no. 1 ni duh tan chetsual a thiang lo.
Messi thlawptu
Lionel Messi thiamzia sawi nawn a ṭul lo a, amaherawhchu a tla hniam ve ta tih erawh zep rual a ni lo. Argentine forward hian tun hma angin thlawptu a nei ṭha tawk lo - Xavi, Andres Iniesta leh Neymar te thlak zo an awm lo a, Sergio Busquets pawhin a duh dana inkhel 'tempo' kaltir a harsat ta.
Barca captain hian thlawptu a mamawh a, chutihrualin a bula awm tur Griezmann leh Suarez te aia thlanawm an awm chuang lo. Chu bakah UCL quarterfinal hi match khat chauh a nih avangin tu emaw ber chet ṭhat zan a nih chuan team ṭha zawka ngaih Bayern tuk dawl nan a tawk ang.
Setien-a'n inkhel thunun a duh erawh chuan midfielder pali a chhawr thei a, Griezmann a awl thei thung. Midfield-ah Sergi Roberto, Sergio Busquets, Arturo Vidal leh Frenkie de Jong te an inrem chuan Bayern midfielder tan an harsa dawn a, Bayern midfielder hlui Vidal en bik a sual lo ang.
German rallian
Bayern Munich-in Bundesliga an thunun a, chutihrualin awlsam taka Chelsea an sawp avangin an ṭha tih a chiang. Bavarians hi kil tinah an ṭha vek a, chutihrualin right back Benjamin Pavard a dam hman a pawimawh. Pavard a awm lo a nih chuan a aiawh tur chu Joshua Kimmich a ni leh dawn.
German player ṭangkai Kimmich hian tun season-ah a hun tam zawk midfield-ah a hman avangin Chelsea nen an inkhelh ṭumin tun hmaa a khelhna ṭhin right back-ah a bel tawk lo - Barcelona lamin hman ṭangkai an tum ang.
Goal nawr kawngah erawh Bayern an ṭha a, Bundesliga-ah goal 100 an khung thei! Lewandowski-a'n hmun awl a neih theih nana Thomas Muller a ṭangkai dan te, mual sira tlan tura Serge Gnabry, Ivan Perisic leh Kingsley Coman an neih dan te en ila, an ṭha tih loh rual a ni lo. Midfield-ah Thiago leh Leon Goretzka te an awm a, Philippe Coutinho pawh bench-a dah thei an nih avangin Barcelona lakah pawh chak zawk tura ngaih an ni.
Bayern Munich
Manager : Hansi Flick
Goalkeepers
1 Manuel Neuer
2 Sven Ulreich
3 Ron-Thorben Hoffmann
Defenders
4 David Alaba
5 Jerome Boateng
6 Javi Martinez
7 Niklas Sule
8 Lucas Hernandez
9 Benjamin Pavard
10 Aphonso Davies
11 Alvaro Odriozola
12 Bright Arrey-Mbi
Midfielders
13 Thiago
14 Philippe Coutinho
15 Joshua Kimmich
16 Michael Cuisance
17 Leon Goretzka
18 Serge Gnabry
19 Corentin Tolisso
20 Kingsley Coman
21 Oliver Batista Meier
22 Malik Tillman
23 Jamal Musiala
Forwards
24 Robert Lewandowski
25 Thomas Müller
26 Ivan Perisic
27 Joshua Zirkzee
Barcelona
Manager : Quique Setien
Goalkeepers
1 Marc-Andre ter Stegen
2 Neto
3 Inaki Pena
Defenders
4 Nelson Semedo
5 Gerard Pique
6 Clément Lenglet
7 Jordi Alba
8 Junior Firpo
9 Ronald Araujo
10 Oscar Minguez
Midfielders
11 Ivan Rakitic
12 Sergio Busquets
13 Sergi Roberto
14 Frenkie de Jong
15 Arturo Vidal
16 Riqui Puig
17 Monchu
18 Konrad de la Fuente
19 Ludovit Reis
20 Jandro Orellana
Forwards
21 Luis Suarez
22 Lionel Messi
23 + Ousmane Dembele
24 Antoine Griezmann
25 Ansu Fati
26 * Martin Braithwaite
Note :
* Ousmane Dembele hi 100% in an la fit lo
* Braithwaite hi season laihawla lakluh a nih avangin La Liga-ah khel thei mah se Champions League-ah a inlan thei lo
Thlirna Tawi
BAYERN MUNICH
Bundesliga
• Match 34 aṭangin vawi 26 an chak a, khingpuite nen vawi li inhnehtawkin vawi li an chak lo. Point 82 an hmu a, anmahni hnaih bertu Borussia Dortmund aiin point 13 in an hmu tam zawk.
• League-ah goal 100 an khung a, goal 32 chhuahin an goal difference chu 68 a ni a, Bundesliga-ah a ṭha lawrlak.
DFB-Pokal
• Energie Cottbus, VfL Bochum, 1899 Hoffenheim, Schalke 04, Eintracht Frankfurt leh Bayer Leverkusen te hnehin an champion.
Champions League
• Tottenham Hotspur, Olympiakos leh Red Star Belgrade te nen group khatah awmin an chak vek.
• Round of 16-ah Chelsea an hmachhawn a, Stamford Bridge-ah 3-0 in an chak a, Allianz Arena-ah 4-1 in an sawp leh a, aggregate-ah 7-1 in an chak.
PLAYER
Robert Lewandowski - Tun season-ah goal 53 a khung tawh a; Bundesliga (34), DFB Pokal (6) leh Champions League (13) ah top scorer a ni.
Serge Gnabry (20), Thomas Muller (12),
Phillipe Countinho (9), Leon Goretzka (8), Kingsley Coman (7), Ivan Perisic (7) leh Joshua Kimmich (6) ten inelna hrang hrangah goal nga an khung tling.
BARCELONA
La Liga
• Match 38 aṭangin vawi 25 an chak a, vawi sarih an inhnehtawk a, vawi ruk an chak lo. Bayern aia match lia league match an khel tam zawk chungin point 82 tho an hmu a, an hmelma Real Madrid tluk loin pahnihna an ni.
• Goal 86 an khung a, goal 38 an chhuah a, goal difference 48 an nei. Real tluk lo mah se Atletico Madrid aiin point 12 in an sang zawk.
Copa del Rey
• Ibiza leh Leganes te an hneh hnuah quarterfinal-ah Athletic Bilbao an hneh lo.
Champions League
• Borussia Dortmund, Inter Milan leh Slavia Prague te nen group khatah an awm a, chak lo an nei lo. Chutihrualin Dortmund leh Prague te nen vawi khat ve ve an inhnehtawk a, a bakah zawng chakin group hmahruaitu an ni.
• Round of 16-ah Napoli an hmachhawn a, Naples-ah 1-1 in an inhnehtawk. Nou Camp-ah 3-1 in an chak a, aggregate-ah 4-2 in an chak.
PLAYER
Lionel Messi - Tun season-ah goal 31 a khung tawh a; inelna pali La Liga (25), Champions League (3), Copa del Rey (2) leh Supercopa (1) a hmachhawnah goal a khung vek.
Luis Suarez (20), Antoine Griezmann (15), Arturo Vidal (8) leh Ansu Fati (8) ten inelna hrang hrangah goal nga aia tam an khung.