Assam-ah ruahtui a tlak nasat avangin kumin fur chhunga tuilian thawh hnihna an tuar thar leh. Tulian vang hian Thawhṭanni khan mi pahnih an thih bakah, district paruk huam chhungah mi 22,000 chuangin harsatna an tawk tih Thawhlehni khan Assam State Disaster Management Authority (ASDMA) chuan a tarlang.
May leh June thla chhung khan ruahsur nasa vangin Assam hian tuilian an lo tuar tawh a ni. Tun ṭuma tuilian hi thingtlang lamin an tuar nasa a, khawpui lamah chuan chhiatna lian tham thleng a awm lo.
ASDMA chuan Golaghat, Biswanath, Sonitpur, Karbi Anglong, Nagaon, leh Cachar district huam chhunga khua 274 leh thlai chinna hmun hectare 4,190-a zau chu tuilianin a chim tawh tih an sawi. Tuilian vanga nunna chan pahnih an awm tawh bakah, ran vulh 50,000 chuang an thi tawh bawk.
Tuilian vang hian mi 22,016, mipa 8,980, hmeichhia 8,199, leh naupang 4,837- te chuan harsatna nasa tak an tawk mek a, relief camp 113-ah mi 6,838 awmin, mi dang 47,644 vel chu relief camp-a awm lo, chhawmdawl ngai an ni thung. Golaghat chu tuilian tuar nasa ber niin mi 12,004 in a nghawng a ni. NDRF leh SDRF-te chuan lawng 27 hmangin tuilian tuarte chhan chhuah hna an thawk a ni. Thuneitute chuan harsatna tawkte tan buhfai quintal 568, dal quintal 102, chi quintal 26, mustard oil litre 2,813 bakah naute chaw, tarpaulin, leh thosilen an sem chhuak tawh a ni.
Guwahati-ah erawh harsatna lian tham thleng a awm lo. Tuilian vang hian Juripar, Satgaon, Hatigaon, leh Sijubari-ahte harsatna tenau awm mah se, thi leh hliam, chenna in aṭanga insawn chhuak leh relief camp-a awm ngai an awm lo thung.
