Meghalaya : CM-in State Guest House hawng

Meghalaya chief minister Conrad K Sangma chuan Thawhlehni khan State Guest House, Taraghar, Shillong-ah a hawng. Rs vbc 24.91 senga sak state guest house thar hi Ward's Lake, Shillong bulhnaia awm a ni.

Hawnna inkhawmah hian deputy chief minister pahnih - Prestone Tynsong leh Sniawbhalang Dhar te bakah cabinet minister, MLA, leh district council member-te an tel.

CM Sangma chuan kum 2018-a sorkarna an siam tirh khan Meghalaya-ah hian state ti hmingṭha thei leh chhinchhiah tlakte a awm lo hle tih sawiin, a kaihhruai sorkarin kawng hrang hrangin hma a la chho a, tuna guest house hawn thar pawh chu an hmalakna zingah a tel tih a sawi.

Deputy chief minister Prestone Tynsong pawhin kum 25 chhung an lo nghah tawh tihhlawhtlin a ni ta chu lawmawm a tih thu sawiin, sorkarin dik takin hma a la a, Meghalaya pawhin kawng dik a zawh mek a ni, a ti. Tynsong chuan CM Sangma-a'n kum 2022-a guest house din tura thutlukna a lo siam chu a fak zui bawk.

State guest house hi Polo Towers-in a enkawl dawn a, an state tlawhtu mi pawimawh tak takte thlenna tura duan a ni. Sorkar pawhin official programme neihna tura man chawia hmun dang a hman ṭhin pawh a titawp thei dawn a, sorkar sum senso pawh tam tak a hum thei dawn a ni. CM Sangma chuan sorkarin infrastructure tihchangtlun a ngai pawimawh tih sawiin, Ward’s Lake chhehvela kawng, kea kalna (footpath) leh vantlang hmun tihchangtlunna turin Rs vbc 40 vel ruahman a nih tur thu a puang bawk. Tun dinhmunah Meghalaya chu India rama economy ṭhang chak pahnihna a ni tih a tarlang.