Manipur governor Ajay Kumar Bhalla hoin Thawhlehni khan Raj Bhavan conference hall, Imphal-ah ‘Governor-in-Council’ meeting hmasa ber neih niin, he meeting hi President's rule hnuaia state a awm hnu leh legislative assembly tih tawp a nih hnua an neih hmasak ber a ni.

He meeting-ah hian chief secretary PK Singh bakah Department hrang hrang aṭangin Principal Secretary, Commissioner, leh Administrative Secretary te an tel. Session chhung hian hmasawnna, rorelna, leh inrelbawlna chungchanga rawtna pawimawh tak takte sawi ho a nih bakah pawm nghal a ni bawk.

Parliament chuan tun hnai khan Manipur-a sum hman tur Rs vbc 35,103.90 tih pun a remti a, kumin financial year atana sum ruahman sak chu Rs vbc 32,656.81 a ni. Capital outlay hi 19%-a tihpun a ni. Hei bakah hian finance minister Nirmala Sitharaman chuan Lok Sabha-a supplementary demands leh Manipur budget chungchang an sawi honaah state tan contingency fund, Rs vbc 500 pek a nih tur thu a puang bawk.

National Highways and Infrastructure Development Corporation Limited (NHIDCL) managing director Dr Krishnan Kumar chuan executive director MS Deval nen Raj Bhavan-ah Governor hi an kawm a, state chhunga national highway project hrang hrang kalpui mekte chu Governor hnenah hriattirin, an kalpui danah harsatna lian tham an tawh mekte pawh a sawipui bawk. Governor chuan heng harsatna sutkian nan leh project hrang hrang a hun taka zawhfel a nih theih nan a ṭul anga hma la turin official-te a hriattir.