Sikkim: Solomon Islands-ah hmarcha thawnchhuak

Agricultural and Processed Food Products Export Development Authority (APEDA) chuan Sikkim aṭangin Solomon Islands-ah hmarcha chi khat, GI-tagged Dalle Chilly, kg 15,000 chu a vawi khatna atan hlawhtling takin a thawnchhuak. Hei hi hmarchhak bial agricultural heritage danglam tak pholanna hun ṭha a nih bakah organic farming lama Sikkim ti langsar theitu tura ngaih a ni.

Dalle Chilly hi Fire Ball Chilly tia hriat niin, hriselna atan pawh a ṭha nia sawi a ni. Scoville Heat Unit (SHU) rating 100,000 aṭanga 350,000 inkar a nih avangin damdawi atan pawh hman theih a ni. Kum 2020 khan Department for Promotion of Industry and Internal Trade (DPIIT)-in Geographical Indication (GI) status pek a ni tawh.

Prime minister Narendra Modi chuan India rama organic farming lama hmarchhak bial pawimawhzia a lo sawi fo tawh a, GI tag hian dikna chhinchhiahna mai ni loin, market thar hawn theihna tur leh loneitute ṭhanlenna tichaktu a nih thu a sawi. India sorkar pawhin hmarchhak biala organic farming chu Mission Organic Value Chain Development for North Eastern Region (MOVCD-NER) kaltlangin a pui nasa hle. He hmalakna hian organic Dalle Chilly siamchhuah leh quality tihsan na kawngah puiin, international market-a inelna pawh a ti sang a ni.