Manipur police leh helpawl, People's Revolutionary Party of Kangleipak (PREPAK) mi leh sate chu December 14, 2024 khan Thoubal district-a Salungpham huam chhungah an inkap. Police hian PREPAK mi leh sa paruk an man a ni.
Police-te hian thu an dawn bawhzuiin PREPAK hel awmna hmunah hian an kal a, anni hian silaia lo kapin police-te hian an chhang let ve nghal a ni. An mi mante hi dan phal loha pawisa khawnaa inhnamhnawihte an ni. An inkahnaah hian PREPAK mi leh sa pakhat, Laishram Prem Singh (18) chu kah hliam niin,
Imphal-a Raj Medicity Hospital rang taka panpui anih hnuin a hliam tuar loin a thi a ni. Nunna chanta chhungte hian August 13, 2024 khan an fapa a bo thu hi an lo report tawh a, mahse PREPAK pawl hi zawmin Kakching Khunou-ah a lo awm a ni.
Manipur police te chuan an mi mante kut aṭang hian ralthuam ṭhahnem tak an man sak bawk a, chungte chu 35.56 mm INSAS Rifle leh a mu pali, 15.56 mm AMOGH Rifle leh a mu pahnih, 17.62 mm SLR Rifle leh a mu pahnih, 1.303 Rifle leh a mu pakhat, 465.56 mm INSAS leh a mu, 275.56 mm AMOGH leh a mu, 257.62 mm SLR leh a mu, 37.303 mu, lirthei ke pali nei pahnih leh mobile handset paruk te an man.
An ralthuam mante hi Manipur police te hnena rukchhuah ni ngeia ngaih a ni a, forensic team leh magistrate chuan chhuichiannaah an pui bawk ang.
Hetih mek lai hian Metei pawl, Meira Paibis chuan police-in an mante chu khaw venghim tura inpe te an nih thu sawiin chhuah zalen turin an phut. Laishram Prem thihdan pawh chhui chian leh, a thihnaa inhnamhnawih police commando pawh man turin an ngen bawk a ni. Thoubal Melaground ah lungawi lohna lantirin National Highway an dang a, lungawi lohna an lantirnaah hian district chhunga Meitei hmeichhe pawl an tel bawk.
