Manipur sorkar chuan an state-a lut turte tana Inner Line Permit (ILP) system a hman hnuah, kum nga chhungih he system aṭang hian state sorkar sum atan Rs vbc 13.3 a la lut tawh.
January 1, 2020 leh December 9, 2024 chhungin mi nuai 9.7 chuang hnena ILP hi pek chhuah a ni tawh. Hengte hi online leh offline hmanga pek an ni. ILP office hi panga a awm a, Assam leh Nagaland ramri bul, Jiribam leh Mao gate pawh siam tel an ni.
Manipur-ah hian kum 2020,January 1 aṭang khan ILP system hi hman ṭan a ni a, hmarchhak state zingah a hmang palina niin, anni hma hian Arunachal Pradesh, Nagaland leh Mizoram chuan an lo hmang tawh a ni. Heng state pathumah hian a mi cheng zinga 90% dawn chu tribal an ni a, hetih lai hian Manipur-ah hian tribal hi 40% vel an ni thung. Hmarchhak state dang - Assam, Meghalaya leh Sikkim pawhin ILP hi hman an phut ve phutin sorkar laipui pawh an nawr ve reng bawk.
He dan hnuaiah hian state pawn lam mi, Manipur tlawh turte chaun ILP hi an lak zel a ngai a ni. Ram dang mi, foreigner erawh a huam lo a, ram dang khualzinte chu Manipur an thlenah Foreigner Registration Office (FRO)-ah an inziah luh a ngai thung. ILP hi state pawn lam atanga phalna nei loa lut tur venna leh khuahkhirhna atan leh, state leilung fate humhalh leh venhimna tura tih a ni. Kum nga an hman tawh chhungin khualzin lut hi an tam hman hle.
Chief miniser N Biren Singh chuan an state tana ILP system hman phalsak an ni hi an state tana thilpek lawmawm tak a nih thu leh, he system hman phalsaktu prime minister Narendra Modi leh sorkar laipui lama hruaitu dangte chungah a olawm thu pawh a lo sawi tawh a ni. ILP hman a nih theihna atana hma la tur leh nawrtu, tlangram leh phaizawla cheng mipuite, zirlai pawl hrang hrang te, civil society organisation leh mimalte chungah a lawmthu a sawi bawk.
