Arunachal Pradesh: AFTF-in hna lak dan ratio siam sut turin ngen

Arunachal Frontier Tribal Front (AFTF) chuan chief minister Pemna Khandu hnenah ziaka ngenna thehlutin; hna lak dan, recruitment ratio 80:20 siam chu sut turin an ngen. Hemi hmanga hna lak chu an duh khawp loh thu sawiin, a ram leilung fate tan a dik tawk lo a ni, an ti.

Chief Minister hnena ngenna an thehluhah, AFTF chuan recruitment ratio zirchiangtu high-level committee in rawtna a lo siam tawh pawh ti khawtlai loa hman nghal an phut thu an tarlang bawk.

AFTF chuan state education minister hlui, Taba Tedir kaihhruai high-level committee chuan an thil zirchianna report pawh hi an buatsaih vek tawh a, mahse state sorkar lam aṭangin official-a update leh chhanna hi engmah a la awm lo a ni, an ti. Arunachal Pradesh Public Service Commission (APPSC) leh Arunachal Pradesh Staff Selection Board (APSSB) in exam an buatsaiha mandatory-a "ST leh Permanent Residential Certificate (PRC)" bakah state chhunga ṭawng hman, tribal language/dialect tleh an phut bawk. Mandatory-a ST leh PRC telh a ni loh hian state leilung faten zawhna tam tak an neih phah bakah, hlauthawnna leh rinhlelhna pawh an nei a ni, an ti. Heng an thil phut chungchangah hian tun thlengin thuneitu lam aṭanga chhanna an la dawn loh thu an sawi.