Meghalaya MLA leh BJP hruaitu, Sanbor Shullai chuan Assam chief minister Himanta Biswa Sarma hnenah Meghalaya-a bawng thawn luhna kawngah harsatna siam lo turin a ngen.

Assam Chief Minister-in an state chhunga vantlang punkhawmna hmuna bawngsa ei khapna thupek a tih chhuah avangin he ngenna hi MLA hian a siam a ni. Shullai chuan Assam-in bawngsa ei khap avang hian an state-a bawng thawnluh kawngah harsat nasa tak a thlen thu a sawi.

Shullai chuan Assam CM hnena lehkha a thawnah, bawngsa ei khap a nih vangin Meghalaya-ah harsatna an tawh phah thu a sawi. Hemi rual hian Meghalaya mipuite sakhaw rinna dodal chu an thlawp lo a, mahse Assam-a bawngsa ei khap chuan Meghalaya-ah boruak lian tak siamin, eptu lam chuan hei hi BJP kaihhruai NDA in ram pum huapa bawngsa ei khap a tumna kalzel a ni tiin mipuiah boruak siamna atana an hman thu a sawi.

Meghalaya hian bawngsa an ei zinga 60% chu state dang aṭanga an lakluh a ni. Bawngsa leh bungrua dang an lakluhna kawngah Assam paltlang a, hei vang hian tualchhunga bawngsa zuarte chu he khapna hian a nghawng tawh niin Shullai chuan a sawi bawk. Hunpui, Krismas leh Kumthar lo thleng tur atana inbuatsaih a nih mek laia an ṭhenawm, Assam-a bawngsa khapna siam hian Meghalaya mipuite a nghawng a, state chhunga bawngsa man pawh a san phah a hlauthawnawm thu a sawi bawk a ni.

Shullai chuan Assam CM chu bawng thawnluh kawngah document fel a nih phawt chuan harsatna siamsak lo turin a ngen.