Manipur: PREPAK (Pro) mi leh sa pathum man

Manipur Police leh Assam Rifle thawkdun chuan December 11, 2024 khan helpawl, People's Revolutionary Party of Kangleipak (PREPAK)- Pro zinga mi pathum an man.

An mi mante hi Nambram Indrajit Singh (22), Rajkumar Mohen Sana (21), leh Warepam Albert Meitei,Thoi tia hriat bawk (21) te niin, Thoubal District-a Thoubal Athokpam-ah an man a, dan phal loha pawisa khawnnaa inhnamhnawih an ni.

Security force chuan an mi mante kut aṭang hian hand grenade (high explosive) pakhat, midang laka PREPAK (Pro) in phutna lehkhathawn an siam panga, mobile phone pathum leh Honda motorcycle pakhat an man tel bawk.

Manipur-a tlangram leh phaizawl district-a ralthuam zawn beihpui an thlakna kal zelah security force te chuan Sarang Tampak leh Hrinkhu, Chandel District ah ralthuam engemaw zat an man bawk. An ralthuam mante hi AK-47 rifle pakhat, AK-47 mu pakhat, 9mm pistol mu, tualchhung siam mortar (Pompi) pathum, tualchhung siam mortar bomb pahnih leh single-barrel silai pakhat te an ni.

Churachandpur District-a Teising huamchhungah pawh silai leh a mu an man bawk a, heng zingah hian .303 rifle pakhat, 12-bore single-barrel silai pali, 9mm pistol pakhat,.22 rifle pakhat, 12-bore shotgun pakhat, 7.62mm mu 11, 9mm mu panga, .22 mu pahnih, 12-bore mu 36, .303 rifle mu pakhat leh pistol mu pakhat an tel.

Security force-te hian National Highway 37 leh 2 aah pawh venhimna hna an thawk bawk a, lirthei 126 leh 372 tlante chu buaina tawk loin an tlan tlangtir a ni. Venhimna hi khauh taka kalpuiin, checkpoint tinah highway-a lirthei tlante chu uluk takin an lo enfiah ṭhin bawk a ni.

Manipur-a district hrang hrang ah checkpoint 106 dah ani a, official te hnen aṭanga thudawn danin buaina tawk an awmloh thu leh dan palzuta thil ti an awm loh thu dawn ani bawk.

Thuneitute chuan Manipur-ah remna leh muanna a awm zel theihnan venhim hna thawh kawngah hma lak anih zel tur thu an sawi.