AP : CM-in Arunachal Vikas Parishad Bhawan a hawng

Arunachal chief minister Pema Khandu chuan Social Justice, Empowerment leh Tribal Affairs (SJETA) leh sports minister Kento Jini te nen December 11, 2024 khan Itanagar-ah Arunachal Vikas Parishad Bhawan (AVP Bhawan) an hawng. He project hi SJETA aṭanga fund an dawn hmanga sak a ni a, sorkarin tribal mipuite leh khawtlang nun tih chakna kawnga hma a lakna a ni.

He multipurpose facility hi Abo Tani Balwani-cum-Multipurpose Activity Centre tih niin, mipuite tan hmasawnna leh hnam ziarang venhim kawnga mellung pawimawh tak a ni bawk.

Hawnna inkhawmah hian Advisor to Akhil Bharatiya Vanvasi Kalyan Ashram (Mumbai) Somayajulu, leh khawtlang hruaitu Techi Gubin leh Gomar Angu te pawh an tel a ni.

Minister Kento Jini chuan Akhil Bharatiya Parishad chungah an thlawpna ṭha tak avangin lawmthu a hrilh. Chief minister Pema Khandu chuan Arunachal Vikas Parishad (AVP) chungah lawmthu sawiin, Akhil Bharatiya Vanavasi Kalyan Ashram-in Arunachal cultural heritage leh hnam tihdan chhawmnun kawnga hma an lakna te a fak bawk.