Naga pawl pathum chuan Meitei kalfawr pawl, Arambai Tenggol in Imphal-a Naga mi pahnih rawng taka an sawisatute man leh hrem turin Manipur a phut a, an thil phut tipuitling turin darkar 48 hun an pe tih Zirtawpni khan an sawi.
Naga People's Organisation, Senapati District Students' Association, leh Senapati District Women's Association chuan hemi chungchangah hian thuchhuah inṭawm siamin, kut tuartu Naga mi pahnihte tan rorelna dik an phut thu an tarlang. "Manipur sorkar chuan darkar 48 chhungin engmah ti khawtlai loin rorelna dik a lantir tur a ni. Hei hi a ti lo a nih chuan, kan mi leh sate venghimna turin na zawkin hma kan la ang, " tiin an tarlang.
Arambai Tenggol mi leh sate hian kar liam ta Ningani khan Imphal-ah Naga mi pahnih, V Hrangao Blesson Poumai leh Dalou Poumai chu na taka an sawisak bakah, silaia tinin an kut aṭang hian Rs 61,400 an chhuhsak bawk tih an sawi. An pahnih hian Naga an ni tih fiahna pawh an entir chungin, silai nen hian vauin kut an thlak zui a ni, an ti.
Helpawl mi 5 man an ni
Manipur police-te chuan Thoubal district-a Charangpat Mayai Leikai-ah helpawl, Kangleipak Communist Party (People's War Group) (KCP-PWG) mi panga an man. An mi mante hi pawikhawihna hrang hrang, mi rukbo te leh dan phal loha pawisa khawnnaa inhnamhnawihte an ni.
Police-te chuan an kut aṭang hian 36 HE hand grenade pakhat, KCP-PWG ten phutna lehkhathawn an ziah pahnih, mobile handset panga, SIM card 13 leh lirthei ke pali nei pakhat an man sak tel bawk. He pawl chetdan leh an thil tum hre tur hian police chuan hma an la mek a ni.
November 2 khan Manipur police-te hian People's Revolutionary Party of Kangleipak (PREPAK-PRO) mi pakhat chu Bishnupur district-a Kumbi area-ah an lo man tawh bawk. An mi man hi Nongmaithem Gunamani, kum 32 mi Allu tia hriat bawk a ni a, helai area a dan phal loha pawisa khawnnaa tel ṭhin a ni. A kut aṭangin 36- type hand grenade, two-wheeler leh mobile phone an man tel a ni.
Manipur-a hian tualchhung buaina thleng mekah police leh security ṭangkawp chuan tlangram leh phai ruama dinhmun derthawng zual laiah helpawl dap beihpui an thlak mek a ni. Thuneitute chuan Manipur-a National Highway 37 leh 2-ah lirthei te him taka an tlan theihna turin venhimna khauh takin an kalpui bawk. Heng kawngah hian nitin mamawh phur lirthei an tlan hnem hle a, an bungraw phurh te him taka an thlen turin hma an la a, district hrang hrangah checkpoint te an siam bawk.
