Assam chief minister Himanta Biswa Sarma chuan Thawhṭanni, October 7 khan state chhunga loneitu mi nuai li chuang hnenah Soil Health Card (SHC) a sem.

Guwahati-a SHC sem chhuahna hun buatsaihah, CM Sarma chuan state sorkar chuan SHC hi nuai 10 vel a sem chhuak dawn tih a sawi a, loneitute tan hma lain theihtawp an chhuah zel tur thu a tarlang. "Prime minister Narendra Modi kaihhruaiin kum 2015 aṭang khan Soil Health Card hi pek chhuah ṭan a ni," tiin SHC chu loneitute tana hamṭhatna pekna tur a nih thu a sawi.

Sarma chuan an state chhunga soil quality enfiahna tur laboratory awm zat chu panga aṭangin 26-ah a pung tawh tih a sawi bawk.

SHC sem rual hian loneitu ṭhenkhat hnenah tractor leh buh sengna khawl sem a ni bawk a, hei bakah hian agriculture knowledge centre chu CM hian a hawng nghal a, agiculture minister Atul Bora-a'n a hmanpui a ni. CM chuan, "Thingtlang khaw 816-ah agriculture equipment bank din tumin hma kan la mek bawk. A hma chuan hetiang hi kan state-ah 80 chauh a ni," a ti. A kaihhruai sorkar chuan agriculture knowledge centre 96 leh agriculture development office 93 a hawn tawh thu a tarlang bawk a ni. Agriculture lam tihchangtlunna tura state sorkar hmalakna chu sorkar laipui pawhin a ngaihven pui hle niin a tarlang.