Manipur: Congress President Singh-a'n ED hmaa inlan tur ṭhulh

Manipur Congress president K. Meghachandra Singh chu Thawhṭanni khan Prevention of Money Laundering Act 2002 (PMLA) hnuaia Enforcement Directorate hma inlan tur koh ni mah se a inlan lo.

Meghachandra Singh chuan Thawhṭannia ED-a inlan tur koh a nih thu chhuahna hi rei tawh mah se Thawhṭanni khan a hriat ve chauh avangin a hun takah a inlan theih loh thu a sawi.

He an kohna hi ED assistant director Amit Kumar chuan October 3 khan an chhuah tawh thu sawiin, Meghachandra hi October 7 ah finfiahna leh record rintlak nena kal tura tih a ni, a ti. A inlan loh chuan PMLA dan anga hrem tura tih a ni bawk.

Congress hruaitu Jairam Ramesh chuan ED thuchhuah hi sawiselin, Meghachandra hi prime minister Narendra Modi, home minister Amit Shah leh Manipur chief minister N Biren Singh te eptu a nih vang mai a ni, a ti. Manipur Pradesh Congress Committee pawhin an party hotuin ED aṭanga kohna a dawng hi BJP in politics phuba lak a tumna mai niin an sawi bawk a, an party hotu hian PM Modi sorkar leh a agency-te lakah Manipur tan thudik a sawi chhuak zawk a ni, tiin court lamah beih chhunzawm an tum tih an sawi.