Assam chhunga district pali - Sivasagar, Charaideo, Dibrugarh leh Dhemaji district te chuan tuilian vangin harsatna an tawk mek. Heng district-te hi Assam hmar chhak lama awm niin tun hnaia ruah sur a tam vangin tui chim chin a san belh a ni.
Assam hian thla hmasa khan tuilian an lo tuar tawh a, mi 106 chuangin nunna an chan nia tarlan niin tuna district palia tuilian vang erawh chuan nunna chan an awm hriat a la ni lo.
Tuilian thlenna district zingah Sivasagar district chu a tuar na ber niin mi 48,000 chuang tuilian hian a nghawng a, Disang lui chim chin a san belh zel avangin tuilian hian ziaawm lam a pan mai a rinawm loh.
Charaideo district-ah tuilian vangin mi 12,000 chuangin harsatna an tawk ve bawk. Dibrugarh leh Dhemaji district-ah erawh tuilianin a nghawng hi mi tlemte an ni thung. Charaideo, Dhemaji leh Sivasagar a chhawmdawlna-inah mi 3,009 an awm mek tih tarlan niin Sivasagar leh Dibrugarh-a relief distribution centers-ah mi 10,558 an awm mek bawk.
Tuilian hian thlai chinna hmun hectares 6,122.5 chuang a tichhia nia chhut niin ran vulh lai 18,631 chuangin tuilian hi an tuar bawk. Dibrugarh-a Tingkhong Development Block-ah 'Kesseru Plantation' bigha khata zau tuilian hian a chim bawk a ni.
Sorkar laipui ministry of home affairs chuan Assam chhunga tuilian leh a kaihhnawih vanga nunna chan zat tichhuakin kum 2019 aṭanga July 25, 2024 thleng chhiarin mi 880 an thi tawh niin a tarlang. Kumtina tuilian leh a khaihhnawih vanga thi zat chu 157 (2019), 190 (2020), 73 (2021), 278 (2022), 65 (2023) leh 2024-ah 117 tih an tarlang bawk.
Assam hian kum 2019-2024 chhung khan sorkar laipui aṭangin ṭanpuina sum Rs vbc 503.10 an dawng a, heng sumte hi tuilian danna tur siam nan leh tuilian vanga chhiatna tuarte chhawmdawl nan hman a ni.
