Manipur : Sorkar laipuiin Manipuri ṭawng tih hmasawn nan ṭanpuina pe

Sorkar laipui chuan Manipuri ṭawng tih hmasawn nan leh humhalh nan Rs vbc 18 a pe. Manipur chief minister N Biren Singh chuan sum pek an nih chungchang hi sawiin prime minister Narendra Modi hnenah lawmthu a hrilh.

Manipur CM chuan Manipuri ṭawng leh a script humhalha hma a sawn zel theih nana sum pek an ni chu an lawm thu sawiin, PM-in Manipuri ṭawng a hre reng chu lawmawm a tih thu a sawi bawk.

Manipur Rajya Sabha MP, Sanajaoba Leishemba-a'n classical language zinga Manipuri telh a nih theih nana a hmalakna chu CM chuan a fak bawk. Sanajaoba hian Manipuri chu classical language huanga telh a nih thuai a beisei tih a lo sawi tawh a ni.

Biren Singh chuan Meitei ṭawng tih hmasawn rualin state sorkar chuan an huam chhunga tribal awmte ṭawng chu humhalh turin hma an la tih a sawi. Tribal ṭawng hrang hrang humhalh nan hian course, activities leh programs neih ṭhin a ni tih a tarlang.

Manipuri hi kum 1992 khan 8th schedule a telh niin India rama official language 22 zinga pakhat niin, Tibeto-Burman ṭawng chhungkua zing aṭanga 8th schedule a tel hmasa ber a ni. Tunah hian classical language a tel tura hmalak mek niin a hlawhtling a nih chuan classical language-a tel ṭawng pasarihna a ni ang.