Meghalaya : NEHU zirtirtuten an VC ban an duh

North Eastern Hill University Teachers Association (NEHUTA) chuan university Vice Chancellor, Prof PS Shukla chu state chhunga tribal-te chunga a chet dan avang leh, university enkawl kawnga a hlawhchham avangin bang turin an duh.

NEHUTA president Prof Lakhon Kma chuan National Commission for Scheduled Tribes (NCST) hnenah lehkha thawnin, an VC Shukla chu tribal-te tiduhdahtu a nih thu a thlen a, tribal ngai thei lo tura zirtir leh hetiang zawnga che ṭhin a nih thu a thlen bawk.

Prof Lakhon Kma chuan an VC chet dan chuan Meghalaya chhunga cheng tribal-te a tihlauthawng niin a sawi. VC Shukla chu university chhunga dinhmun pawimawh chelh turah ram leilung fate en kan ṭhin a ni tiin, NEHU chhunga lungrual taka hnam hrang hrang an lo awm ho tawhna chu thlak thleng tumah a puh bawk a ni.

Vice Chancellor Shukla a nih hnuah zirna-in chuan tlakhniam lam a pan tih an tarlang bawk a, kum 2021-a Shukla VC a nih ṭan kum khan NEHU chu university ṭha tehnaah 59-na niin kum 2022-ah 66, 2023-ah 80 leh kuminah a hniam ber ṭum tawngin 136-ah an tla hniam tih a sawi.

NEHU VC Shukla chuan a hna a chelh chhunzawm zel a nih chuan university inkaihhruaina a palzut chhunzawm zel a hlauhawm a, tribal zirlaite leh zirtirtute humhim turin hmalak vat a ngai tih Prof Kma chuan a sawi.