Manipur chief minister leh finance minister ni bawk, N Biren Singh chuan Nilaini, July 31, 2024 khan kum 2024-25 atana state budget a pharh. Kum 2024-25 atana state sum ruahman chu Rs vbc 34,899 a ni.

Chief Minister chuan state chhunga buaina vangin sum leh pai dinhmun a tlahniam tih a tarlang. Tualchhung buaina vangin chhiah khawn a tlahniam a, venhimna lamah insensona tur a tam phah bakah thil man a sang hle tih budget speech-ah hian a tarlang a ni. Manipur buaina hian ei leh bar lakluh kawnga harsatna a siam bakah schemes leh project thawk turin harsatna a siam nasa hle. Heng avang hian state chhung sum lakluh chu a tlakhniam bakah hmasawnna hnathawh pawh duh angin kalpui theih a ni lo. State chhung boruakin ziaawm lam a pan leh ṭan avangin sum leh pai dinhmun pawhin hmalam a pan an beisei tih a sawi.

Manipur budget 2024-25 atana sum ruahman chu Rs vbc 34,899 niin Finance Minister chuan sorkar laipui hnen aṭangin an sum hloh hmu let turin puihna an dawng ṭha hle tih tarlangin, hemi atan hian sorkar laipui chuan Rs vbc 500 a pawmsak tawh tih a sawi. Biren chuan buaina vanga sorkar laipuiin chhawmdawlna sum a pek tawh hrang hrang sawilang bawkin, Rs vbc 101.75 chu chhawmdawlna-in leh raltlante tan a pe tawh a, hemi hnu hian Rs vbc 209.45 chu tualchhung buaina tuarte chhawmdawl nan sorkar laipui chuan a pe leh bawk. Raltlante chhawmdawlna-in sak nan Rs vbc 145.18 chu sorkar laipui chuan a pawmpui tawh tih a sawi bawk.

Budget tharah hian Centrally Sponsored Schemes (CSS) hnuaia an sum hmuh a pung dawn tih Singh chuan a sawi a, agriculture and allied sector tan Rs vbc 883 dah a niin hetah hian fisheries, horticulture, animal husbandry leh organic crops tana sum dah pawh a tel a ni.