Sikkim : NH 10-ah leimin thleng a tlem nan hma la dawn

Sikkim chhunga kawngpui pawimawh National Highway 10, Sevoke leh Rangpo inkara fur laia leimin thleng vanga harsatna tawh ṭhin chinfel nan Ministry of Road Transport and Highways chuan hma a la dawn.

Union transport minister Nitin Gadkari chuan NH-10 kawngpuia kilometer 52-a thui chu leimin thlen tamna hmun a nih thu Rajya Sabha-ah sawiin, leimin bakah lei tlahniam chu he kawngpuiah hian kum 2023, October-a Glacial Lake Outbust Flood an tawrh hnuah a tam zual tih a sawi. Heng harsatnate ching fel tur hian sorkar laipui chuan leimin a tlem theih nana hna thawhna tur, Rs vbc 125 a ruahman tih Gadkari chuan a sawi.

Nitin Gadkari chuan sorkar laipui hian sum hi project pali atan a ṭhenhrang a, heng hmang hian leimin a tlem theih nan hna thawh a ni ang. He sum hmang hian leimin hlauhawmna lai hmun 16-ah hna thawh a ni dawn a ni. Project pakhat, Rs vbc 68.49 sennaa thawktu tur tih fel tawh niin a bak zawng erawh bidding stage-ah a la awm a ni. Kum 2023-24 sorkar kumah khan leimin a tlem theih nana hna thawh nan Rs vbc 394 dah a lo ni tawh a, hemi sum hmang hian leimin thlen ṭhinna lai hmun 19-ah hna thawh a ni. Ministry of Road Transport and Highways hian NH-10 a leimin vanga harsatna an tawh ṭhin a reh theih nan leh Sevoke-Rangpo inkara thawmṭhat ngaite thuam ṭha turin Project Management Consultancy-te tan Detailed Project Report (DPR) siama bid thehlut turin a hriattir bawk a ni.