Manipur-a buaina chhuah tharna hmun, Jiribam-ah central forces leh Jiribam police-te chuan ralthuam an dap an kalpuinaah mipuite ei tur- buhfai, alu leh dal te chu an suasam tih Kuki Inpi Jirbam, Tamneglong & Noney (KIJTN) te chuan an tarlang.
Security force-ten Jiribam district-a Mongbung khua an dapnaah he thil hi a thleng nia tarlan a ni a, KIJTN chuan an pawikhawihna chu mihring inzah lohna lian tak a nih thu an sawi. Meitei lamin Jiribam district chhunga chakkhai phurh luhna kawng an dan ṭhin avangin harsatna an tawh thu an tarlang tel bawk. Mongbung khua an dap hi Meitei kalfawr pawlten he khua leh a chhehvel an beih hnu lawka thleng a ni tih an sawi bawk.
KIJTN chuan Phaitol khuaa hmeichhiate lakah an zahawmna tibawrhbang thei zawnga chetna a awm tih an tarlang a, hemi bakah hian pawisawi lo naupangte chu khung hran a ni bawk a ni, an ti. Heng a nih avang hian Manipur chhungah hian Meitei kalfawr pawlte leh security force-te chu an thawh ho rinna a lian hle a ni, an ti.
Kuki Chief Association (KCA) Tousem Block, Kuki Students’ Organization Jiri & Tamenglong leh Kuki Inpi Women Wing te chuan thuchhuah inṭawm siamin, heng thil thleng chungchanga mawhphurtu sipai ṭhenkhat sawn chhuah an duh tih an sawi a, pawikhawihnaa inhnamhnawihte chu mawhphurhna la ngam tura an duh thu an tarlang a ni. Heng pawikhawihna thleng avanga thil ṭha lo dang a thleng a nih chuan a mawhphurtu turte chu district thuneitute, security agency-te leh state sorkar an ni ang, an ti bawk.
Jiribam-a inkahna thlengah CRPF pakhat a thi
Jiribam district chhungah inkahna thar thleng lehin CRPF officer pakhat in a thi. Kuki lamin silai leh bomb hmangin Meitei-te chu an bei a, hemi avang hian in kang pawh a awm niin Meitei lam chuan an tarlang.
Meitei pawl, Jiri Apunba Lup (JAL) chuan Meitei leh venghimtute chunga tharum thawhna thleng ṭhin chu an dem tih sawiin security force-te chu tharum thawhna thleng ṭhina hma la ṭha loah an puh a, helpawl beihna lakah an venghim zo lo a ni, an ti. Hetih lai hian Kuki lam chuan Meitei police commando-te chuan Kuki Village Volunteers (KVV) an kap tih tarlang ve thungin hemi chhanlet nan hian inkahna a chhuak niin an sawi ve thung.
