Tripura : Left Front-in darkar 12 awh bandh huaihawt

Tripura Left Front chuan Panchayat inthlan atana an candidate, Badal Shill (kum 51) thah a nih vangin nimin khan state pum huap darkar 12 awh bandh an huaihawt.

Tripura Left Front Convener Narayan Kar chuan thuthar thehdarhtute nen an inkawmnaah BJP party mi leh sate chuan CPIM worker-te chu July 11 a nominaton paper an thehlut haw lam chu hriamhrei hmangin an lo bei tih a sawi a, hemi hnu hian Chottakhola bazar lama Shill a kal leh chu dawr aṭanga hnuh chhuah niin sawisak a ni zui leh a ni, a ti. Badal Shill chu Santirbazar District Hospital panpui niin GB Pant lamah kalpui leh a ni a, a hliam an zai zawh hnuah a thi ta niin Narayan Kar chuan a sawi.

CPIM hruaitu Kar chuan Tripura mipuite chu tualthahna thleng chungchangah hian anmahni thlawp tura a duh thu sawiin an bandh pawh ṭha taka thlawp turin mipuite chu a sawm a, state sorkar chuan pawikhawihtute man chhuak thuai turin chak takin hma la se an duh tih a tarlang tel bawk. State chhunga bandh huaihawt hian ṭulbik thil erawh a huam lo tih Narayan chuan a sawi.

Left Front hoin bandh an huaihawt hi a hlawhtling lo hle a, dan pangngaia dawr inhawng leh lirthei che vel a tam hle. State police-te chuan thil thleng duhawm lo a awm lo tih sawiin nunphung pangngai angin state mipuite chu an kal niin an tarlang.