Indigenous Tribal Leaders’ Forum (ITLF) kaihhruaina hnuaiah Thawhṭanni khan Manipur-a Kuki-Zo hnamte chuan kawng an zawh. Kawngzawhtute hian Manipur buaina a reh theih nan thuneihna an kuta hlan an phut a, chumi a hlawhtlin theih nan chuan Union Territory pek an phut.

Churachandpur district leh tribal tamna district dang- Kangpokpi, Tengnoupal, leh Pherzawl-ah kawng zawhnaah hian mi tam tak an pung khawm a ni. Pung khawmte chuan tharum thawhna thleng ṭhin chu reh tawh se an duh tih tarlangin, thuneihna an kuta hlan a nih hma loh chuan buaina chu a tawp thei dawn lo niin an sawi. Kuki-Zo hnam tan India danpui Article 239A hnuaiah rorelna hran pek an phut tih an tarlang a, Union Territory an hnam tan an ngiat a ni.

ITLF Chairman, Pagin Haokip chuan Manipur buaina chungchangah sorkar laipui a inrawlh a hun takzet tawh tih sawiin, tribal-te chuan UT legislature neih an duh tih a sawi tel bawk. Haokip chuan ngaihsakna an dawn loh vang leh tharum thawhnaa bitum reng an nih avangin an mipuite dawhtheih chin a pel tawh tih a sawi a, an dikna humhim a nih theih nan leh tribal-te zahawmna humhim nan thuneihna an kuta hlan a hun takzet tawh tih a sawi.

Kawng zawhnaah hian Manipur buaina vanga tribal-te tawrhna hrang hrang tarlang a ni a, buaina chhuah hnuah tribal tam tak thah an nih bakah an awmna hmun aṭanga sawn chhuah niin an eizawnna thlengin an buai tih an tarlang. ITLF chuan buaina chhuah hnuah tribal 200 dawnin nunna an chan tawh thu leh, chenna in 7,000 chuang tihchhiat a ni tawh tih an tarlang bawk.