Nagaland : Kum 20 hnuah ULB inthlan neih a ni dawn

Nagaland-ah vawiin hian Urban Local Body (ULB) - Municipal Council leh Town Council inthlan neih a ni dawn a, hei hi kum 20 hnua ULB inthlan an neih leh ṭum khatna tur a ni ang.

Khawpui huamchhunga roreltu tur thlanaah hian hmeichhe tan seat 33% hauh a ni dawn a, hei hi Nagaland-a a ṭum khatna tur a ni.

Nagaland chhungah hian Municipal Council pathum leh Town Council 36 a awm a, state pumah ward 418 awmin heng aṭang hian ward 142 chu hmeichhe tana hauh a ni. ULB inthlan chuh tum hian mi 670 in hming an pe lut a, an zinga pali hi hnawl niin a hnuah mi 79 chu an inhnukdawk bawk. Candidate zinga 64 chu chuhtu awm loin tlinga puan an lo ni tawh bawk. ULB inthlanah hian vote nei nuai 2.76 an awm a, heng mite hian candiate 523 aṭangin an aiawh tur an thlang dawn a ni.

ULB inthlan neih tur hi dik leh fel fai taka neih a nih theih nan, Nagaland a helpawl lian ber, National Socialist Council of Nagalim (NSCN) chuan an mi leh sate chu inthlannaah hian inrawlh lo turin a chah. NSCN chuan inthlannaa an mi leh sa thil dik lo ti an hriat chhuah chuan hrem an nih tur thu a tarlang. Nagaland Baptist Church Council (NBCC) pawhin mipuite chu vote an thlaknaah ngaihtuahna fim tak hmang turin an duh tih an tarlang ve bawk.