Assam : AAP-in Assam-a an party an ṭhiat

Aam Aadmi Party (AAP) chuan Thawhṭanni khan Assam-a an party chu an ṭhiat (dissolve) tih an puang. AAP chuan hetianga an tih chhan hi kum 2026-a Assam assembly inthlan lo awm tur atana an party inpuahchahna a ni tih an tarlang tel bawk.

AAP hian X-a party official handle-ah thuchhuah siamin,"Assam inthlan lo awm tur atana party chak zawk kan neih theih nan, tuna Assam a kan organisation ding lai mek hi ṭhiah a ni ang" tiin an tarlang. AAP chuan an party ruangam thar tur duan a nih hma loh chuan State President, State Secretary leh State Treasurer te chuan an dinhmun ngai an chelh rih dawn tih an puang.

Assam-a AAP thar din tur hian working committee din niin convenor atan Dr Bhaben Choudhury ruat niin co-convenor atan Manoj Dhanowar dah a ni bawk. An pahnih bakah working committee-ah hian member pali- Rajiv Saikia, Mamun Imdadul Haque Chaudhary, Rishiraj Kaundinya, Anurupa Dekaraja te an awm bawk.

Kum 2026-ah Assam assembly inthlan hi neih a ni dawn a, state assembly-ah hian seat 126 awmin BJP kaihhruai National Democratic Alliance (NDA) chuan seat 75 lain sorkarna an chang mek a ni. Assam chief minister Himanta Biswa Sarma chuan BJP kaihhruai NDA chuan state inthlan lo awm turah hnehna an chang leh ngei dawn tih a sawi a, seat 90 aṭanga 100 inkar vel an lak a beisei tih a sawi. Hetih rual hian Lok Sabha inthlanpui neih zawh takah khan BJP hian MP ngah zawk mah se, BJP (37.43%) aiin Congress (37.48%) vote share a ṭhat zawk avangin Assam assembly inthlan neih turah hian eptu lam an phur hle a, an dinhmun pawh a chhe lo tih a hriat theih a ni.