Internal Displacement Monitoring Centre (IDMC), Geneva-in report a tihchhuahah Manipur tualchhung buaina avangin mi 67,000 chuan an in leh lo an tlansan tawh tih a tarlang. Hei hi India ramah kum 2018 hnu lama buai avanga raltlan an tam ber ṭum nia tarlan a ni.

IDMC report hian buaina leh tharum thawhna thleng avanga tlanchhia an tam hle tih tarlangin, Manipur buai chhan ber chu Manipur High Court-in sorkar laipui hnena Meitei tribal nihna pe ve tura thurawn a pek vang a ni, a ti. High Court thurawn pekhian Manipur chhunga tribal chengte lung a tiawi lo hle a, hnam tlem zawk humhim nana pek ṭhin tribal nihna chu Meitei hnam pe ve tura thurawn chhuah a ni chu tribal hnam hrang hrang, a bikin Kuki-te chuan an hrethiam lo hle a ni. Hemi bakah hian buaina chhuah chhan pakhat chu ram inchuh vang a ni tih report chuan a tarlang bawk.

Churachandpur district chu buai inṭanna a nih thu sawiin, hemi hnu hian Imphal East, Imphal West, Bishnupur, Tengnupal leh Kangpokipi-ahte buaina chu a darh ta niin report chuan a tarlang. Buaina avanga mahni in leh lo chhuahsan zinga a tam zawk chu Manipur chhungah tho an tlanchhia tih a tarlang. A bak midang ṭhahnem tak chu Mizoram lamah an lut a, heng bakah hian Assam leh Nagaland lama tlanchhia tlema zawng an awm tih report-ah chuan tarlan a ni bawk.

India ram pumah kum 2023 chhung khan mahni in leh lo tlansan mi nuai 6 an awm tih report chuan tarlangin, Manipur chhunga buaina avanga mi 67,000 tih loh midang zawng chu khuarel chhiatna hrang hrang- tuilian, thlipui, lirnghing leh chhiatna dang thleng avanga in leh lo chhuahsan an ni tih tarlan a ni.