BJP-in seat 400 aia tam an lak a ṭul : Assam CM

Assam chief minister Himanta Biswa Sarma chuan inthlanpui neih mekah Bharatiya Janata Party (BJP) chuan seat 400 aia tam an lak a pawimawh tih a sawi. Sarma chuan hnehna sang taka an chan ngei a rin thu a sawi tel bawk.

Chief Minister Sarma chuan Lok Sabha seat 400 chuang neih a pawimawhna sawiin, Jammu and Kashmir pumpui chu India awpna hnuaia dah nan hnehna sang tak BJP chuan an chan a ngai a ni, a ti. Ram pum huapa Uniform Civil Code (UCC) hman a nih theih nan BJP chuan hnehna sang taka an chan a ngaih thu a sawi tel bawk.

Assam CM chuan India ram sum leh pai dinhmun chungchang sawi lang bawkin, US leh China chu kum 2047 hmaa khum hman an tum niin a sawi. Hemi ti thei tur chuan parliament lama seat ngah tak nih a ngai a, chu chuan policy leh thil thar ṭha zawk huaisen taka kalpui turin a pui dawn a ni, a ti.

Enforcement Directorate (ED) leh Central Bureau of Investigation (CBI) chu thawm ṭhat a ngai tih Sarma chuan a sawi a, heng institution pawimawh tak pahnih hi dan leh hrai kenkawh kawnga hnathawktu pawimawh tak an nih bakah, eirukna do nana pawl ṭangkai tak an nih avangin tun aia chak zawka thuam a pawimawh tih a sawi a, chumi ti thei tur chuan Parliament-ah MP an ngah a ngai tiin a sawi.