Awmze nei loa thawktu lak avangin district council pahnihin sumah harsatna tawk : Meghalaya CM

Meghalaya chief minister Conrad Sangma chuan state chhunga district council pahnih, Garo Hills Autonomous District Council (GHADC) leh Jaintia Hills Autonomous District Council (JHADC) chuan sum lamah harsatna an tawk tih a sawi.

Meghalaya CM chuan district council pahnihte'n harsatna an tawh chhan hi awmze mumal nei loa hnathawktu an lak vang niin a sawi. Meghalaya chhunga district council pathum hotute nena an inkawmnaah Chief Minister chuan hei hi sawi chhuakin, GHADC leh JHADC harsatna tawh ang hi Khasi Hills Autonomous District Council (KHADC) chuan a tawk ve lo niin a sawi thung.

CM Sangma chuan kum 2015-16 khan GHADC hnuaiah thawktu 2,500 dawn an awm laiin KHADC-ah erawh thawktu 800 aia tlem an awm tih a tarlang. GHADC forest department hnuaiah thawktu mi 450 an awm mek tih leh JHADC education department hnuaiah thawktu mi 300 an awm tih a sawi bawk. Heng hna lakte hi politics-a intihlawm tumna a ni a, kalphung mumal lo takin hna an la ṭhin a ni, a ti.

Hnathawktu an ngah avang hian district council pahnih chuan harsatna an tawk tih Sangma chuan a sawi a, GHADC chu uluk takin a vil tih sawiin, kum ruk chhung chu hnathawktu an lak belh tawh lo tih a tarlang tel bawk.