Nagaland : NSCN-IM-in zan lama intihhlimna hmun hawn khap

Nagaland a helpawl pakhat, National Socialist Council of Nagaland-Isak Muivah (NSCN-IM) chuan Dimapur chhunga zan lama intihhlimna hmun hrang hrang; nightclub, pub leh disco-na hmunte chu khar turin thupek a tichhuak.

NSCN-IM hian thu leh awm hma chu hriattirna an chhuah ni aṭang hian zan lama intihhlimna hmun zawng zawngte chu khar turin a ti a ni. Hetiang thupek an chhuah chhan hi mipui lam aṭanga complaint a awm vang leh, tlawmngai pawl hrang hrangin hetiang hmunhmate a awm hi ṭha an tih loh vang nia tarlan a ni. Dimapur chhungah hian NSCN-IM thununna hnuaia awm hmun tam tak a awm a ni.

Solomon Sumi, NSCN (IM) secretary chuan hmeichhe naupang kum la tling lote chu heng hmunahte hian hmuh an nih bakah, nupui nei tawh leh ram dang aṭanga sumdawng lo kalte chuan heng intihhlimna hmunahte hian vantlang ngaihtheih loh thil an ti ṭhin tih a sawi. Heng avang hian mipui lam aṭangin hekna an dawng tih a tarlang.

NSCN-IM hian zan lam intihhlimna mai bakah damdawi zuarte leh phur darhtute chu fimkhur turin a chah bawk. Sumi chuan ṭhalai ruihhlo bawiha tang an tam lutuk chu veiawm a tih thu sawiin, a chhan pakhat chu awlsam taka ruihhlo an hmuh theih vang niin a sawi. An thuchhuah ngai pawimawh loa ruihhlo zuar lui man tawk an awm a nih chuan na taka hrem an tum thu a sawi. An huam chhunga khawtlang duh loh zawnga chetna awm chu NSCN-IM UT office-ah hriattir turin mipuite chu an chah bawk.