Meitei hmeichhe pawl, Imagi Meira convenor, Thokchom Sujata chenna in chu mi tu tih hriat lohte'n silaiin an kap a, hemi avang hian Imagi Meira-te chuan lungawi lohna an lantir.

Sujata hian April 20 khan thuthar thehdarhtute nena an inkawmnaah misual bike hmanga tlan kuala silai hmanga mi rikrap ṭhin an awm thu sawiin, hetiang tih chingte man chhuak tur hian Manipur sorkar chuan hma la se an duh thu a tarlang. Sujata hian Manipur buaina chu chinfel thuai a ngaih thu leh, thla 11 chhung chu motor kawng hmangin Imphal chhuahsan a harsa tawh tih sawiin buaina chinfel dan kawng dap a hun tawh tak zet niin a sawi. He thu a sawi zan la la hian Sujata chenna in chu silai hmangin beih a ni.

Imagi Meira-te chuan an convenor beih a ni hi an dem thu sawiin, pawikhawihtute chu sorkarin chhui chhuak ngei se an duh thu an tarlang. Singjamei huam chhunga cheng hmeichhiate chuan an lungawi lohna lantir nan sit-in protest an huaihawt a ni. Beih a tawh hnu hian Sujata chuan hetianga mi beih chingte hi tlawmngai pawl leh mipuite chuan ṭangrualin an man chhuah a ngai tih a sawi. Manipur buaina chungchang pawh sawi lang lehin, chi leh chi inkara buaina chinfel a nih theih nan inbiakna a pawimawh hmasa ber a, tharum thawhna pawh inbiakna neih hnuah chuan a ziaawm ngei a beisei thu a sawi.