North Garo Hills tlawmngai pawl leh AMSU-te'n inbiakna nei

Meghalaya chhunga Assam mi pathum tual thihna avanga buainain zual lam a pan zel loh nan All Assam Minority Students’ Union (AMSU) leh North Garo Hills (NGH) a tlawmngai pawl hrang hrangte chuan Pathianni tlai khan inbiakna an nei. He inbiakna hi Goalpara district-a Dudhnoi IB-ah neih a ni.

Assam mi pathum tual thihna avang hian AMSU chuan lungawi lohna lantirin National Highway-ah an pungkhawm a, tual thattu chhuichhuah emaw lusun chhungte zângnadawmna pek emaw an nih loh chuan Assam leh Meghalaya inkalpawhna kawngpui zawng zawng an dang dawn niin an tarlang. Pathianni tlaia state pahniha pawl hrang hrang inbiakna neih a nih hnuah thuchhuah inṭawm siamin, pawikhawihna chungchangah thu dik tawk lo thehdarh lo turin mipuite an ngen a, hetiang a chetna hian thudik hai lanna a dal thei niin an tarlang.

Pawl hrang hrangin thuchhuah inṭawm an siamah hian pawikhawihna chu an dem takzet tih sawiin, pawikhawihtute hnam emaw, awm hmun emaw chu thudik hailan kawnga daltu ni lo tura an duh thu an tarlang tel bawk. Thuneitute kutah chhui chianna dah a ṭul thu an sawi a, tual thihna thleng chuan chi leh chi inkarah buaina chawk chhuak lo se an duh thu an tarlang tel bawk. State pahnih mipuite chu thudik a lan chhuah theih nan leh rorelna dik a awm theih nan ṭangrual tlat tura an duh thu an tarlang tel bawk.

AMSU-Goalpara district president, Aminul Hoque Choudhury chuan tluang taka inbiakna an neih theih thu leh, pawl hrang hrangte chu thawkho turin an inpeih thu a sawi a, Meghalaya leh Assam chief minister bakah union home minister hnenah tual thahna thlengah rorelna dik an awm ngei theih nan chak takin hmalak nise an duh tiin lehkha an thawn thu a sawi bawk.