INDI Alliance hi rin ngam an ni lo : Tripura CM

Tripura Chief Minister Manik Saha chuan Congress leh a thawhpui party-te ṭangrualin an din, INDI Alliance chu mipui tan rin ngam an nih loh thu a sawi. Saha chuan inthlan hmaa INDI Alliance-te thusawi leh thutiam chu lemchanna mai a ni tih mipuite'n an hrethiam a ni, a ti.

Tripura CM hian kum 2014 kha chuan India ram hma lam hun chu ngaihtuahawm tak a nih thu a sawi a, UPA sorkar hnuaiah eirukna a hluar hle a, India sipaite'n beih an tawh bakah Parliament hial pawhin beih a tawk niin a sawi. Kum 2014-a prime minister Narendra Modi kaihhruai sorkar a pian hnuah India ram dinhmun a inthlak thleng chak hle a, Modi chuan sorkar ṭha mipuite tan a pe niin Saha chuan a sawi bawk.

CM Saha chuan,"UPA sorkar laia China-in India ram a lak hek dan kan hmu vek a, Modi sorkar hnuaiah erawh khawi ram mahin India ram an nek ngam lo a ni. PM Modi chuan hmarchhakin hma a sawn loh chuan India ram pumin hma a sawn thei lo tih a hria a, chuvang chuan HIRA Model leh Act East policy-te chu hmarchhak hmasawn nana duan a ni," a ti.

Saha hian sorkar hmalakna hrang hrang chu mipuite tana hamṭhatna siam tumna a nih thu a tarlang. INDI Alliance-in democracy a ral mek tia an beih ṭhinna chu chhang letin, rally an buatsaih ṭhinah pawh mi tam tak an pung khawm ngai lo niin a sawi a, mipuite chuan lem an chang tih an hriatthiam vang niin a sawi.