Arunachal : Sinnu khaw mite'n helpawl paruk an man

National Socialist Council of Nagaland (NSCN) helpawl mi leh sa ni ngeia hriat mi parukte chu Arunachal Pradesh-a Tirap district huam chhunga Sinnu khuaa chengte'n an man. Helpawl mi leh sate hian helai chheh velah hian buaina siam an tum bakah inthlan neih turah inrawlh an tum nia sawi a ni.

Helpawlte hi MLA candidate pakhatin ni khatah Rs. 2,000 hlawh turin a chhawr a, Sinnu leh a chhehvela chengte chu an vau ta ṭhin a ni. Hemi an duh loh avang hian khaw mite chu inthurualin helpawlte an bei let a, an man hnuah thuneitute kutah an hlan ta a ni.

Arunachal khawchhak lama district pathum TCL belt tia hriat Tirap, Changlang leh Longding (TCL) hi helpawl chettlat tamna hmun niin, hemi huam chhunga chengte hian helpawl avanga buaina an neih ṭhin chu tihtawp a nih theih nan sorkar hnenah helpawlte remna siampui turin an ngen a ni. Hetiang hmalakna a awm chuan helpawlte chuan an ralthuamte tungin civil mite nunphunga an nun ve tawh TCL belt a chengte chuan an beisei.